Москваысь продюсер Алевтина Стручковаӧс Комиын бура нин тӧдӧны. Сылӧн «Арт-Маяк» фестивальыс котыртліс миян республикаын выставкаяс, концертъяс. Отсалӧ сійӧ и енбиа том войтырлы — музыкантъяслы, художникъяслы — аддзыны ассьыс видзӧдысьӧс да кывзысьӧс.
Сылӧн водзмӧстчӧмӧн тулыснас «Музейяслӧн вой» акция дырйи «Пейзажи Севера» да Национальнӧй галереялӧн сайтъясын ворсіс Юрий Северянин, а сентябрнас Алевтина Стручкова да Юрий Северянин волісны Комиӧ, петкӧдчисны Сыктывдін районса Нювчимын Прометей Ионович Чисталёвлы сиӧм «Времён связующая нить» фестивальын да Ыб-са финн-йӧгра этнопаркын. Юрий Северянинлӧн вӧлі ыджыд онлайн-концерт «Фан-зонаын». Сійӧс позьӧ видзӧдны ӧтуввезса vk.comӦvideo-163528871_456239179 лист бокысь.
Вай матысяньджык тӧдмасям Юрий Северянинкӧд.
—Меным вӧлі дас кык арӧс, кор кылі «Брат-2» фильмысь саундтрек, и аслым сэтшӧм окота лоис шылад гижны. Босьтчи велӧдчыны ворсны гитараӧн. Дас вит арӧсӧн муні музыкальнӧй школаӧ, но кык тӧлысь и велӧдчи, а сэсся ачым куті сӧвмӧдны ся-мӧс. Унаысь сорсьылӧмӧн, быдтор видлӧмӧн вочасӧн аддзи, кыдзиджык колӧ меным сьывны. Позьӧ шуны, кылі ассьым гӧлӧсӧс сэтшӧмӧн, кутшӧмӧн кӧсйи кывны, — висьталіс Юрий.
Ворсӧ Юрий акустическӧй рок. Кутшӧмкӧ кадколастӧ пӧ менам сьылӧм-ворсӧмӧ мӧрччис «Кино», роч рокысь мукӧд группаяслӧн творчествоыс, и рытыввывса музыка, америкаса гранж. И ставныс пӧ колисны меӧ ассьыныс пас.
—Сьыланкывйыд уна ног вермӧ чужны — нывкӧд, ёртъяскӧд аддзысьлӧмысь. Сэсся и инструментъясӧн ворсан шылад чужлӧ, — водзӧ висьталіс Юрий. — Сьыланкывйыс менам вель уна, и гижтӧмыс уна жӧ. Но мукӧдсӧ концерт дырйи он на вермы сьывны, вывті кӧ «ёсь» сійӧ.
Юрий кӧсйӧ, мед сылӧн концертъяс вылӧ чукӧртчылісны найӧ, кодъяс сьыланкывтӧгыс ассьыс олӧмсӧ оз аддзыны. И мед пӧ концертасянінын шыыс бура юргис-кыліс.
Петербургын, Москваын фестивальяс дырйи тӧдмасьлӧма ас мозыс жӧ мӧвпалысь войтыркӧд.
—Вячеслав Оноприенколӧн UtroVechera уджтасын ми ӧтлаын дасьтім «М.Н.Б.» проект. Слава гижис менам куим сьыланкывлы аранжировка, ворсіс гитараӧн, а Ольга Афонина — скрипкаӧн, — висьталіс Юрий. — Бӧрас Вячеслав сетіс меным фонограммаяссӧ да шуис, вай пӧ гӧлӧстӧ гиж, сьыв, и тайӧ лоас миян ӧтувъя удж.
«М.Н.Б.» сингллы дизайнсӧ вӧчӧма Москваысь художник Ольга Вавилова. Юрий Северянинлӧн кывъяс серти, дизайныс пӧ зэв зумыд, и таӧн воӧ сьӧлӧм вылӧ. А «Набело» альбомыслӧн дизайнернас Юрий ачыс нин вӧлӧма, ачыс бӧрйӧма, кутшӧм шыпасъяс лӧсяласны сэтчӧ, кутшӧм серпасъяс туясны. Сійӧ шуӧ, ӧтуввезйын пӧ шыладтӧ дон босьттӧг колӧ паськӧдны. Медым пӧ быдӧн, кодлы сьӧлӧм вылас воӧны сьыланкывъясыс, вермис кокниа аддзыны найӧс. Но сэк жӧ пӧ музыкантлӧн, художниклӧн, композиторлӧн уджысь колӧ мынтысьны. Налӧн зільӧмыс пӧ ӧд нинӧмӧн оз торъяв мукӧдлӧн уджысь.
—Бизнес да шылад йылысь кӧ сёрнитны, то менам творчествоӧй оз на вермы лоны бизнесӧн, ӧд сьӧмсӧ аслым лоӧ вичмӧдны та вылӧ. Ме ӧні ог на думайт шылад-сьыланкыв лӧсьӧдӧмысь сьӧм босьтӧм йылысь, — шуис сійӧ. — И оз ков вунӧдны, мый творчествоыд медвойдӧр асьтӧ сӧвмӧдӧ. Быд музыкант аслас сьыланкывйӧн, шыладӧн кӧсйӧ воӧдчыны йӧзлӧн вежӧрӧдз да бур боксянь мӧрч-чыны налӧн видзӧдласӧ. И тайӧ кӧ артмӧ, сэки тэ шуда. Шуда, эмӧсь кӧ йӧз, кодъяслы колӧ тэнад шыладыд. Тайӧ ышӧдӧ водзӧ зільны.
Юрий мӧвпалӧ чукӧртны акустическӧй котыр, кӧні ритм-секцияас вӧліны эськӧ бас-гитара, кахон, джембе, а солируйтан инструментыс — виолончель, скрипка либӧ электрогитара. А сэсся репетируйтны да петкӧдлыны концертъяс.
Юрий Северянин чужлӧма Белоруссияса Брестын, ӧні олӧ Москваын. Миян странаным пӧ зэв мича, и уналаӧ нин мойвиис волыны: Петербургӧ, Магнитогорскӧ, Уфаӧ, Войвыв Кавказӧ. И Москва пӧ тшӧтш жӧ аслыспӧлӧса мича кар. Збыльысь пӧ ӧд шулӧны, мый оз местаыс мичмӧд мортсӧ, а мортыс — местасӧ. И та вӧсна пӧ позьӧ овны Му шарлӧн быд пельӧсын, радейтны сійӧс да гижны сы йылысь сьыланкывъяс.
А кор юалі, мый татчӧ волӧм бӧрын сылӧн, гашкӧ, и Коми му йылысь сьыланкыв чужас, Юрий Северянин ышнясьтӧг вочавидзис, чужас пӧ. Сідзкӧ, кутам виччысьны.
Павел Симпелев.
Снимокъясыс ӧтуввезйысь.