Ми ёна майшасям чужан кывъяс бырӧм вӧсна. Талун мирас артавсьӧ 6.700 гӧгӧр сёрнитан кыв. И быд кык вежон пӧ бырӧ ӧти, сы вӧсна мый кувсьӧ сійӧс бӧръя тӧдысьыс.
Мӧвпыштлыны кӧ, кыв бырӧмыс зэв топыда йитчӧма и чужанін бырӧмкӧд. Бӧръя кызь вонас Россияын эновтӧмаӧсь 24 сюрс сикт-грезд. Артмӧ, луннас овтӧмӧн кольӧ кодлӧнкӧ вит чужанін.
Дерт, оз ставныс лӧсьыд олӧм корсьӧм могысь орӧдчыны вужсьыныс да пышйыны ыджыд карӧ. Видзӧдлыны кӧ Комиысь эндӧм оланінъяс, унджыкас войдӧр вӧр пӧрӧдлӧмаӧсь да из шом перйылӧмаӧсь.
Пырӧны, шуам, парма-ягад пила-чера йӧз, и регыдӧн ли дырӧн гӧгӧрыс кыпалӧны керкаяс, зымӧбтӧны нуръясянін-клуб, сад-школа, лавка-пошта да мукӧд колана стрӧйба. Йӧзыс чайтӧны, мый тадзи лоас нэмсӧ. Но татшӧм «нэмъясыс» тай абу и ёна кузьӧсь вӧлӧмаӧсь, гашкӧ, сӧмын гоз-мӧд кӧленалы и тырмӧмаӧсь. Тадзи вӧліны да ӧні абуӧсь Сыктыв районса Копса, Княжпогост районса Лемъю, Удора районса Верхнеземенск либӧ Кӧрткерӧс районса Расъю да сё миллион на татшӧм посёлок…
Сэтшӧм кымын жӧ и мупытшса озырлун перйысьяслӧн оланінлӧн помыс. Локтісны уджавны, овмӧдчисны-ладмӧдчисны, челядь лӧсьӧдісны. А сэсся из шом вылын кутчысьӧм олӧмыс быри…
Тані кӧть Воркута бердса став посёлоксӧ лыддьӧдлы: Промышленнӧй, Воргашор, Сыръяга, Хальмер-Ю, Мульда, Юр-Шор… Мукӧдыслысь и нимъяссӧ некод нин юрас оз кут…
Вӧвлӧм посёлокъяссӧ ловзьӧдӧм йылысь эськӧ сёрниыс абу. Но ӧд и на понда, кодъяс талун быран выйынӧсь да аски-аскомысь тшӧтш виньгыртасны, государстволы – шог ни печаль.
Збыльвылас кӧ, гырысь чинаяслы кивыв, мед йӧзыс олісны гырысь каръясын. Ӧти кывъя, ӧткодь школа-университет помалысь, ӧтмоз би-ва-шоныдысь вештысьысь, ӧткодь лавкаысь ньӧбасьысь, банкъяслы ӧти пӧлӧс кабалаӧ шедӧм, ӧти нянь сёйысь, ӧти и сійӧ жӧ кино-театрӧ ветлысь, ӧти вомӧ видзӧдысь… Татшӧм войтырнад майбыр веськӧдлынытӧ…
А быдӧн кӧ пондас овны ас чужанінас да корны, мед буретш сэні лӧсьӧдасны морт олӧм, сэки нӧ мый лоас?!. Быд сикт-посёлокӧ ӧд ковмас нюжӧдны бур туй, котыртны уджаланін, лэптыны выль сад-школа, чужан кывйӧн лэдзны газет-небӧг… А мыйкӧ кӧ не сідз лоас, ковмас нӧшта на быдсяма дивитӧм-критикуйтӧмсӧ кывзыны да оз ӧнія моз сӧмын кывнад отсавны, а збыльысь мыйкӧ вӧчны…
Анжелика Елфимова.