2021 вося апрель 1-30 лунъясӧ Россия пасьтала арталасны-гижаласны став олысьсӧ. Медводдзаысь на перепись дырйи кутасны вӧдитчыны лыдпаса технологияӧн, и мортыс ачыс вермас пасйысьны Госуслуги порталын.
Россияса ӧткымын регионын, кытчӧдз сьӧкыд воӧдчыны, гижасьӧмыс заводитчис октябрь 1 лунӧ нин. Миллион джын мортӧс пасъясны Тыва Республикаын, Томск обласьтын, Ямал-Ненеч кытшын.
Ставнас жӧ 2020 вося октябрь 1 лунсянь 2021 вося июнь 30 лунӧдз гижаласны странаса 26 регионысь 200 сайӧ ылі районса 2.600 сикт-грездын олысьӧс. Миян республикаын урчитӧм кадысь водзджык переписьыс заводитчас 2021 вося февраль 1 лунсянь да мунас тӧлысь чӧж.
Комиын сьӧкыд воӧдчыны 17 муниципалитетса 149 сикт-грездӧдз. Кызвыныс – Изьва, Мылдін да Чилимдін районъясын.
Ылі грездса войтыр вермасны пасъясьны сӧмын переписчик отсӧгӧн. Перепись нуӧдысьяслӧн лоас «Всероссийская перепись населения 2020» гижӧда гӧрда-лӧза шарп да югъялысь визьяса, перепись логотипа кельыдлӧз жилет. Морӧсас лоӧ эскӧданпас да быдӧнлӧн сьӧрсьыс паспорт.
Госуслуги порталын позьӧ пасйысьны сӧмын локтан вося апрель 1-25 лунъясӧ. Ӧтуввезса тайӧ лист бокнас ӧні вӧдитчӧ 100 миллионысь унджык морт. Тӧдӧмысь, унаӧн на пиысь пасъясясны асьныс.
Йӧзӧс гижалӧм-арталӧм кежлӧ дасьтысьӧм йылысь юӧрӧн позьӧ тӧдмасьны Bl-платформаын. Сэні жӧ йӧзӧдасны и гижалӧмыслысь кывкӧртӧдъяссӧ. Быдӧн вермас восьтывны тайӧ лист боксӧ да аддзыны сылы колана лыдпасъяссӧ.
Кодъяс оз на сяммыны вӧдитчыны компьютерӧн да ӧтуввезйӧн, налы отсӧг вылӧ воасны волонтёръяс.