Октябрь 6 лунӧ «Монди Сыктывкарса ЛПК» эштӧдіс Эжва ю да берегъяссӧ вӧйӧм керйысь да кӧртысь весалан удж. Таво весавнысӧ босьтчылісны кылӧдчӧм помасьӧм бӧрын пыр жӧ.
Эжва ю кузя да сылӧн вожъясті кер-пуръяссӧ век кылӧдлісны. Дерт, вӧрыс, а сідзжӧ и кылӧдчигӧн вӧдитчан кӧрта кӧлуйыс вӧйліс. Но юсӧ весавны да джудждаммӧдны эз тэрмасьлыны. Вочасӧн сійӧ ёна ямис, и 2016 воын «Монди Сыктывкарса ЛПК» дугӧдчис Эжва кузя кылӧдчӧмсьыс.
Но та вылӧ видзӧдтӧг компания эз эновтчы ю весалан уджысь да вайӧдіс пӧрадокӧ Сыктывкар бердын предприятиелысь акваториясӧ: Тентюковса запань, Ягбӧж куръя да кер кыпӧданінӧдз Эжвалысь шуйга берегсӧ, а сідзжӧ Кебанъёль, Керчомъя, Озъяг, Ульяна, Трёхозёрка дорысь да юркарса Доручастоклы паныд юсӧ. Компания идраліс и Бессоновскӧй, Слӧбӧдаса да Белоборскӧй куръяяс, Такелаж база, Алёшиноса запань да Визябӧж бердса тыкӧлалысь веськыд берегсӧ.
2020 воын лои весалӧма Эжвалысь 153 километр берег – комбинатлӧн вӧр дасьтан цех дорын да Кӧрткерӧс районса Адзорӧм тыын. Сӧмын кӧрт шыблассӧ юсьыс перйӧма 55 тонна. Та дырйи уджсӧ эштӧдӧма урчитӧм кадсьыс тӧлысьӧн водз, а Росприроднадзорлӧн комиссия некутшӧм элясьтӧг примитӧма уджсӧ.
–Юсӧ кызвыннас весалӧма вӧйӧм керйысь да кӧртысь. Локтан воӧ ми водзӧ нуӧдам тайӧ уджсӧ да помӧдз нин эштӧдам экология проектсӧ, – висьталіс «Монди Сыктывкарса ЛПК»-ысь главнӧй эколог Дмитрий Очертенко.