Кольӧм пекничаӧ Коми Республикаса юралысь Владимир Уйба аддзысьліс национальнӧй спорт сикас – лямпа-лызьӧн котралӧм кузя федерацияысь исполнительнӧй директор Афанасий Габовкӧд. Вужвойтырлысь спорт сикассӧ сӧвмӧдӧм йылысь ӧтувъя сёрниӧ пырӧдчисны тшӧтш регионса физкультура да спорт кузя министр Николай Бережной да Кӧрткерӧс районса администрацияӧн веськӧдысь Константин Сажин.
Афанасий Габов тӧдчӧдіс, мый лямпа-лызьӧн котралӧмӧ сюртчысьыс республикаын ӧтарӧ содӧ. Комиын 13 во нин котыртлӧны «Лямпиада» фестиваль, кӧні Кӧрткерӧс районса Ыджыдвиддзын петкӧдчӧны оз сӧмын асланым, но и мукӧд регионысь да суйӧр сайысь войтыр. А Удораын нималӧ тӧвся спорт сикасъяслы сиӧм «Кытшъяс» фестиваль, кӧні венласьӧны тшӧтш и вӧралан лызьӧн ордйысьысьяс.
Афанасий Габов тӧдмӧдіс регионса юралысьӧс республикаын вӧралан лызьӧн котралӧмсӧ сӧвмӧдӧм-нимӧдӧм кузя уджтасӧн да пасйис, сійӧс олӧмӧ пӧртӧмсӧ пӧ колӧ ӧддзӧдны. Ӧд тайӧ сідз шусяна брендыс сетас позянлун ышӧдны волыны Комиӧ унджык туристӧс.
Республикалы 100 во тыран воӧ пӧ паськыда колӧ нуӧдны-нимӧдны и «Лямпиада» фестиваль, а сы кежлӧ дасьтысьны ӧнісянь нин. Афанасий Габов серти, быть колӧ ньӧбны ордйысьӧм-гажас пырӧдчысьяслы тырмымӧн лызь-лямпа, электроннӧй оборудование да трасса дасьтӧм могысь техника-агрегат. Тӧдчана и мичмӧдны-бурмӧдны фестиваль нуӧданінсӧ да вевттьыны асфальтӧн сэтчӧ воӧдчан туйсӧ, медым гожӧмнас сійӧн вӧдитчисны лыжероллерӧн тренируйтчысьяс. Кӧрткерӧс районса веськӧдлысь Константин Сажин юӧртіс, мый туйсӧ вӧчасны локтан воӧ, районса бюджетын та могысь урчитӧма 2 миллион гӧгӧр шайт.
Владимир Уйба воис Афанасий Габовкӧд ӧти кывйӧ да ошкис вужвойтырлысь спорт сикас сӧвмӧдӧмын водзмӧстчӧмсӧ. Республикаса юралысь эскӧдіс, мый став вӧзйӧмсӧ быть лоӧ пӧртӧма олӧмӧ.