Октябрын Войвылын видз-му овмӧсса кызвын уджсӧ сигӧртӧма нин: турун – зорӧдын, картупель да мукӧд град выв пуктас – гӧбӧчын, скӧт – гид-картаын. Позьӧ и чомӧрасьны, тшӧтш и нимӧдны видз-му овмӧсын зільысьясӧс.
Буретш тайӧс и вӧчам тайӧ вежалунӧ – октябрь 11 лунӧ. Аттьӧалам видз-му овмӧсын ӧнія да вӧвлӧм уджалысьясӧс мудз тӧдтӧг зільӧмсьыс, пӧсь кисьтӧмӧн мырсьӧмсьыс, миянӧс тшыг олӧмысь мездӧмсьыс да, дерт, сикт-грездын олӧм кутӧмсьыс. Сиам зумыд дзоньвидзалун, выль вермӧмъяс да шуда-бур олӧм!
Сыктывдін районса Зеленечын олысь Анатолий Егорович Попов пуктіс донъявны позьтӧм ыджыд пай Коми муын видз-му овмӧс кыпӧдӧм-сӧвмӧдӧмӧ да нимӧдіс чужаніннымӧс Россия пасьтала. Сьӧкыд да кывкутана уджыслы сиис нелямын во, мыйысь сійӧс пыдди пуктӧны ӧнія аграрийяс, вӧвлӧм уджъёртъясыс да, дерт, республикаса сикт-грездын олысьяс.
Анатолий Егорович Поповлӧн олӧм-удж йылысь паськыдджыка лыддьӧй «Коми му» газетлӧн локтан номерысь.