Камчаткаса губернатор юӧртіс регионас регыдъя кадӧ «министерство счастья» котыртӧм йылысь. Официальнӧя пӧ выль ведомствоыд кутас шусьыны «министерство социального благополучия и семейной политики», но дженьыдасӧ – «шуд министерство».
Владимир Солодов серти, гырысь чинаяслы оз ков уджавны сӧмын артмӧм мытшӧдъяс разьӧм могысь, а колӧ тшӧтш и йӧзыслы тыр-бур олӧм лӧсьӧдны, мед найӧ кылісны асьнысӧ збыльысь шудаӧн.
Колӧ шуны, Владимир Викторовичлӧн тайӧ мӧвпыс абу выльтор. Водзынджык нин Федерация Сӧветса спикер Валентина Матвиенко вӧзйылӧма лӧсьӧдны татшӧмторсӧ, но сійӧс мыйлакӧ некод абу кылӧма. А ӧні со, буракӧ, кылӧма «медматыс» губернаторыс.
Социологъяс серти, Европаын медся шудаӧн асьнысӧ лыддьӧны Нидерландыын, Австрияын да Финляндияын олысьяс. Сизим воӧн пӧ (бӧръяысьсӧ тайӧс туявлӧмаӧсь 2013 воын) шуда йӧзыс содӧма сэні кык прӧчент.
Россияын пӧ шудаӧн либӧ пӧшти шудаӧн асьнысӧ кылӧ 81 прӧчент олысьыс. 29 прӧчентыс висьталӧма, мый шудыс семьяын, 22-ыс – асланыс да матыссаяслӧн дзоньвидзалунын, 13-ыс – бур уджын да челядьын.
Гашкӧ, оз и ков нин некутшӧм торъя «шуд министерство», сідз нин кӧ та мында шудаыс миян. Да и шудыд ӧд быдӧнлӧн аслас…
Вермас на лоны бара дзик мӧдарӧ… Кыдз шуласны, вӧчам, кыдзи бурджык, а артмас, кыдзи и пыр…
Со тай эм туй овмӧс министерство, да сӧмын подалы ни «кӧрт вӧлалы» ветлыны некыті. Эм удж кузя министерство, да уджтӧмалысьыс тырыс. Эм весиг спорт министерство, сӧмын тай спортсменъяс нималӧны сӧмын налысь допинг аддзӧмӧн…
Да, пӧлинӧ… Валентина Матвиенкоыд ӧд вӧзйыліс на индыны нӧшта ӧти выль министрӧс – «министр одиночестваӧс». Великобританияын татшӧм министрнас кык во сайын лоӧма Трейси Крауч. Сылӧн могыс – отсавны кывны асьнысӧ коланаӧн олӧма йӧзлы, кодъяс странаас пӧшти 9 миллион морт. Миян кӧ пӧ татшӧм министрыд лоас, майбыр олӧм воссяс пӧрысьӧ-нэмӧ.
Ме серти, кутшӧмкӧ чина морт кӧ нӧшта на и тайӧ водзмӧст-чӧмсӧ кылас да пондас олӧмӧ пӧртны, весиг мӧвпыштлынытӧ он куж, кытчӧдз ми воам…
Анжелика Елфимова.