«Коми му» газетлӧн кольӧм номерын юӧртлім, мый неважӧн юркарын муніс «Коми велӧдысь-2020» республикаса конкурс, кытчӧ пырӧдчисны кар-районса школаясысь да детсадъясысь 12 велӧдысь да воспитатель. Тайӧ тӧдчана конкурсас вермысьясӧн лоисны Кулӧмдін районысь Руч сиктса шӧр школаын коми кыв велӧдысь Диана Гребенюк да Сыктывдін районысь Паджгаса детсадйын музыка велӧдысь Варвара Симакова.
Тайӧ петасын матісяньджык тӧдмасям Варвара Геннадьевна Симаковакӧд. Дас квайт во ань уджалӧ Паджгаса детсадйын, велӧдӧ дзолюкъясӧс сьывны-йӧктыны, а такӧд тшӧтш пестӧ роч зонпоснилӧн сьӧлӧмын коми кыв, культура да традиция дорӧ муслун. Ыджыд удж бергӧдӧ Варвара Геннадьевна и бать-мамкӧд: ӧтув уна сикас гаж дасьтӧны, коми шаньга пӧжалӧны, коми сьыланкывъяс велӧдӧны. Ань серти, буретш пӧ тадзи ӧтув зільӧм-уджалӧмӧн и артмӧ пестыны рочӧн сёрнитысь дзолюкъяслӧн сьӧлӧмын коми кыв дорӧ муслун да пыдди пуктӧм, а сідзжӧ сюркнявны пель саяныс выль тӧдӧмлун.
Варвара Геннадьевна став сьӧлӧмсяньыс радейтӧ ассьыс уджсӧ да ёна кӧсйӧ, мед сылӧн быдтасъясыс и водзӧ велӧдасны коми кыв, тӧдмасясны чужан мулӧн традицияясӧн, пыдди пуктасны вужвойтырлысь культура, а налӧн бать-мамыс гӧгӧрвоасны, кутшӧм тӧдчана ставыс тайӧ, да водзӧ отсасясны кагульничаяслы.
Галина МАКАРОВА. Снимокыс авторлӧн.