Сюсь вылад нӧшта на сюсьджык сюрас!

Гырысь каръясын улич тырӧн ӧлӧдӧны, мед йӧзыс оз сетчыны бӧбйӧдлысьяслы, ичӧт сиктъясын погонаяс керкаысь керкаӧ ветлӧдлӧны да ӧлӧдан кабалаяс разӧдӧны. Ми со газетаным гижлім жӧ нин ӧнія шышъяс йывсьыд, но, видзӧдлыны кӧ, ставыс тайӧ весьшӧрӧ. Кодсюрӧ, гашкӧ, и сюсьмыштӧ, но кызвыныс век на чайтӧ, мый сійӧс татшӧм рӧкыд некор оз су.

Но выльысь и выльысь кылан, мый кодлыкӧ звӧнитӧмаӧсь «банкын зільысьяс» да юӧртӧмаӧсь, карта вывсьыд пӧ вермасны гуны сьӧмсӧ, да колӧ котӧрӧн сэтысь вуджӧдны мӧд тшӧт вылӧ, кытысь некод нин оз вермы шышнитны. И эскӧй кӧть эн, йӧзыс кыв ни джын шутӧг вӧчӧны, мый налы тшӧктӧны! Звӧнитысьясыд сэтшӧма кужӧны эскӧдны, мый унджыкыслы юрас оз волы кӧть нин здук майшасьыштны да мӧвпыштны збыль-ӧ тайӧ? Со тадзи неважӧн Ухтаын олысь «козьналӧма» бӧбйӧдлысьясыдлы 6 миллион шайт. Сӧмын та бӧрын том мужичӧйыд сайкалыштӧма да шыӧдчӧма полицияӧ. Сыктывкарса аньлы бара жӧ «сьӧм дӧзьӧритысьяс» тшӧктӧмаӧсь висьтавны картаыслысь став гуся пароль-лыдпассӧ да ӧти здукӧн асалӧмаӧсь 80 сюрс шайт. Юркарса мужичӧйлысь дзик жӧ тадзи вермӧмаӧсь сӧпнитны карта вывсьыс 500 сюрс гӧгӧр.

Воӧн-джынйӧн сайын Княжпогост районысь пенсионерка заводитӧма ӧтуввезйын ворсны биржа вылын. Тайӧ каднас вӧвлӧм бухгалтерыд дзик тӧдтӧм йӧзлы вуджӧдӧма матӧ 560 сюрс шайт. Кӧсйӧма нӧшта сетны 200 сюрс, но медбӧрти бур йӧзыс «ас садяс вайӧдӧмаӧсь» да звӧнитӧмаӧсь полицияӧ. И сӧмын погонаяс отсӧгӧн гӧгӧрвоӧма, мый сійӧ вӧлӧм оз нажӧвитчы, а прӧжӧвитчӧ. А Ухтаысь пенсионерӧс босьтчӧмаӧсь велӧдны биржа пыр кокни сьӧм перйыны, да ассьыс куньыштӧмаӧсь 200 сюрс шайт.

Кор татшӧм налькъяс йывсьыс кылан, сӧмын шпыннялан. Но кор тӧдсаыд либӧ ёртыд сэтчӧ шедӧ, ньӧти нин оз пет серамыд

Со менам ӧти тӧдса муртса на босьтӧма вӧлі кредит, но шышъясыд кыськӧ кывлӧмаӧсь та йылысь, и ӧд вежӧра, сюсь аньыд восьтӧма налы дзик-дзик ставсӧ, мый звӧнитчысьясыд юалӧмаӧсь. Бӧрас бӧрдӧмсорӧн висьталіс, быттьӧ пӧ садьтӧ воштан да он ачыд, а кодкӧ тэ пыдди висьтавлӧ телепон пыр гуся юӧрсӧ

И банкын збыльысь уджалысьяслысь, и тӧдса полицейскӧйяслысь юаси, кыдзи, мися, видзчысьны татшӧм неминучасьыс да, найӧ, видзӧдӧмпырысь, и асьныс шӧйӧвошӧмаӧсь.

Но век жӧ ӧні ме некутшӧм тӧдтӧм номерсянь звӧнитысьлы ог вочавидз. Сэтшӧм кӧ окота мекӧд йитчывны, позьӧ гижны СМС. И ӧтуввезйын некутшӧм письмӧ вылӧ, кӧні юӧртӧны, кодкӧ пӧ кӧсйӧма жугӧдны поштатӧ да колӧ дзик пыр йитчывны татшӧм телефон либӧ адрес пыр, непӧштӧ ог вочавидз, а весиг ставнас ог лыддьы. Кӧть эськӧ зэв окота

Анжелика Елфимова.

Сюсь вылад нӧшта на сюсьджык сюрас!

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх