Сентябрь 16-18 лунъясӧ юркарын муніс «Коми велӧдысь-2020» республикаса конкурс, кытчӧ пырӧдчылісны кар-районса школаясысь да детсадъясысь 12 велӧдысь да воспитатель. Урок-занятие дырйи быдӧн на пӧвстысь став сьӧлӧмсӧ сетӧ коми кыв да культура-традиция велӧдігӧн, пестӧ коми да роч быдмысь войтырлӧн вежӧрын чужан кыв дорӧ муслун да пыдди пуктӧм.
Тайӧ тӧдчана конкурсас вермысьясӧн лоины Кулӧмдін районса Руч сиктысь коми кыв велӧдысь Диана Гребенюк да Сыктывдін районысь Паджгаса детсадйын музыка велӧдысь Варвара Симакова. Ми пӧся чолӧмалам аньясӧс!
Вайӧ матӧджык тӧдмасям Диана Алексеевна Гребенюккӧд. Сійӧ чужӧма-быдмӧма Кулӧмдін районса Руч сиктын. Юркарса первой номера педучилище помалӧм бӧрын воӧма аслас школаӧ велӧдысьӧн нин. Уджысь орӧдчывтӧг помалӧма Сыктывкарса университетын финн-йӧгра факультет. И со 23 во нин зільӧ коми кыв да литература велӧдысьӧн.
«Коми велӧдысь» конкурсӧ Диана Алексеевна некымын во нин кӧсйӧма пырӧдчыны. Кольӧм во весиг куим лун кежлӧ волӧма юркарӧ, медым ас синмӧн аддзывны мукӧд велӧдысьыслысь петкӧдчӧмсӧ. А таво со и ачыс нин пырӧдчис да вермысьӧн лоис.
–Меным ёна воис сьӧлӧм вылӧ ставнас конкурсыс. Ньӧти эг повзьы нуӧдны тӧдтӧм челядьлы урок. Аслам удж кузя мыйта бурсӧ да коланасӧ сюркнялі пель сайӧ! Чайта, быд велӧдысьлы колӧ пырӧдчывны татшӧм конкурсъясас. Тані ӧд и асьтӧ петкӧдлан, и вынтӧ видлан, и содтӧд тӧдӧмлун-сям босьтан, – кывкӧрталіс Диана Алексеевна.
Галина МАКАРОВА. Снимокыс авторлӧн.