Дзик на неважӧн чайтсис, мый коронавирустӧ вермим венны, а со бара нин сыӧн выльӧн висьмысьяслӧн лыдыс республикаын пондіс лунысь-лун содны. Гожӧм помас кӧ луннас вӧлі висьмӧ комын гӧгӧр морт, ӧні со татшӧмыс кык пӧв унджык – сизимдас гӧгӧр нин. Коронавирусыд тыр ӧдӧн паськалӧ гырысьджык каръясын: Сыктывкарын, Воркутаын, Интаын да Ухтаын. Саридз дорын шойччысьяс гортаныс воалӧм бӧрти тӧдлытӧгыс разӧдӧны ас гӧгӧрныс пӧрӧстӧ.
Коми Республикаӧн веськӧдлысь Владимир Уйба бӧръя кадас весиг повзьӧдлыны кутіс, онӧ кӧ пӧ бӧр пондӧй новлыны маска-перчаткитӧ, онӧ кӧ кутӧй резны кинытӧ антисептикӧн, вермас лоны, бара на ставнымлы ковмас гортаным йӧршитчыны. Карантин бӧрын муртса на восьтӧм театр-кинозалъяс ковмас бӧр тупкавны. А сӧмын на «лолалыштны босьтчысь» ас вылӧ уджалысьяс бара кутасны коньӧравны…
Дерт, быд во на арнас йӧзыс ёнджыка висьлісны – тайӧ каднас ёна паськалӧ грипп да ОРВИ. Но та пӧрйӧ «важ» вирусыскӧд нӧшта на сӧльнитчӧ и «выльыс» да нӧшта на лӧсьыда кылӧ асьсӧ мортлӧн вир-яйын…
А ми ӧд со мустӧммӧм нин маска-перчаткитӧ чивкниталім ылӧ-ылӧ. И лавка ӧдзӧсын видзчысяна гижӧд вылад весиг ог видзӧдлӧй, быттьӧ абу миянлы сійӧс ӧшӧдӧмаӧсь. И кор ньӧбасигад касса дорад миянӧс тшӧктӧны маскаасьны, мый вынысь босьтчам вензьыны вузасьысьыдкӧд. Сэсся и автобусӧ пыригӧн маскатӧ пасьтавны юраным оз волы. Билет вузалысьыслӧн тай эм-а, мый нӧшта колӧ?..
И татшӧм серпасыс, видзӧдлыны кӧ, абу сӧмын Комиын, но и быдлаын страна пасьтала.
А ӧд апрель тӧлысьын на Владимир Путинӧн кырымалӧм индӧдтӧ, код серти карантин торка-лӧмысь вермасны штрапуйтны (15 сюрс шайтсянь 300 сюрс шайтӧдз), эз на киритны.
Буретш штрап отсӧгӧн тышкасьӧны коронавирусыдкӧд тшӧтш и суйӧр сайын.
Шуам, Великобританияын, кӧні тшӧтш жӧ пондӧма паськавны пӧрӧсыд, карантин торкалысьлысь кутасны перйыны 10 сюрс фунт стерлинг (миян ногӧн кӧ, ӧти миллион шайт).
Испанияын кӧ аддзасны, мый тэ лавкаті шӧйтан маскатӧг, штрапсӧ ковмас мынтыны 9 сюрс, Францияын – 12 сюрс, Турцияын – 31 сюрс, Германияын – 45 сюрс гӧгӧр, Ӧтув Араб Эмиратъясын – 61 сюрс, а Италияын – 90 сюрс шайтӧдз…
Дерт, позьӧ эскӧдны асьтӧ, мый некутшӧм коронавирус абу, такӧдны асьтӧ, мый Енмыс ӧнӧдз быд пӧрӧсысь на видзліс да, ковидсьыд тшӧтш кыдзкӧ-мыйкӧ видзас… Но висьман кӧ (тьпу, тьпу, тьпу!..), оз ков бӧрыннас кодӧскӧ мыждыны…
Анжелика Елфимова.