Куим лун чӧж бӧрйим Коми Республикаса юралысьӧс, Каналан Сӧветса да кар-райсӧветса депутатъясӧс. И, колӧ шуны, ӧнія гӧлӧсуйтӧмсьыд некод, чайта да, нинӧм шензьӧданасӧ эз и виччысь.
Миян выль юралысьӧн лоис Владимир Уйба, код дор сетісны 73,18 прӧчент гӧлӧссӧ.
Вит тӧлысь сайын нин Владимир Викторович веськыда шуліс, мый кӧсйӧ лоны Комиын юралысьӧн. Ме пӧ локті татчӧ эг бӧра-водз, а бура дыр кежлӧ.
И со дзик пыр мыйкӧ да зільны-нускыны кутіс, а вӧчӧм-керӧмыслы кывкӧртӧдсӧ висьтавны ӧтуввез пыр.
Но, колӧ шуны, Гапликов бӧрын кӧть кутшӧм «легзьӧм» кӧть кутшӧм чиналӧн нин чайтсис «сос пуджӧмӧн» зільӧмӧн. Ӧд бӧръя кадас Сергей Анатольевичӧс позис казявны сӧмын гажъяс вылын. А олӧмнымӧс бурмӧдӧм могысь пӧ, кывсис, борщевик пыдди ми босьтчам быдлаӧ кӧдзны кукуруза…
Но кыдз ті тӧданныд, юралысьлӧн креслӧӧ пуксьыны нӧшта на окотитысьясыд вӧліны. Андрей Никитин (ЛДПР) чукӧртӧма 10,83% гӧлӧссӧ, Сергей Пономарёв (КПСС) – 5,73%, Виктор Бетехтин («Зелёная альтернатива») – 5,71%.
Республикаса Каналан Сӧветӧ комын местаысь джынйыс вичмис ютыръяслы: «Единая Россиялы» – 6 мандат, ЛДПР-лы да КПРФ-лы – куим мандатӧн, «Справедливая Россиялы», «Родиналы» да «Зелёная альтернативалы» – 1 мандатӧн.
Мӧд джынсӧ юкисны ас костаныс торъя кандидатъяс. Дас нёль мортыс – «Единая Россияысь» и сӧмын ӧти – Николай Братенков, кодӧс бӧрйӧмаӧсь Ираёль кытшсянь, – КПРФ-ысь. «Канал Сӧвет» оланпас серти, сійӧ либӧ тайӧ законсӧ вынсьӧдӧны, сы дор кӧ лоӧ унджык депутатыс. Артмӧ, кызь депутатнад «единоросъяслӧн» та боксянь некутшӧм мытшӧд оз ло. Кыдзи и водзыннас. Шуа тай, нинӧм эз вежсьы…
Мыйла? А сы вӧсна, мый бӧрйысьны волӧма Комиын сӧмын 30 прӧчент олысьыс. Артмӧ, 70 прӧчентыслы миян республикаын ставыс лючки-бур? И найӧ сэсся локтан вит во чӧжыс вомнысӧ оз восьтывны, оз кутны няргыны, мыйла татшӧм лёка олам?..
Анжелика Елфимова.