Ми, Висерса Вадор улича вылын олысь войтыр, шыӧдчам газет пыр чина йӧз дорӧ.
Таво ода-кора тӧлысьӧ Висер сикт ёна ойдлiс, и ва улӧ веськавліс уна керка. Республикаӧн веськӧдлысь В.В.Уйба сэки юӧртiс, мый ойдысьяслы отсӧг пыдди сетасны 30 сюрс шайтӧн. Но тайӧ сӧмын кывъяс…
Миянлы, быд во ойдысьяслы – Вадор уличаса 31, 16, 18, 22 номера керкаясын олысьяслы – зэв забеднӧ, мый миянлысь воштӧмнымӧс донъялicны 1 сюрс шайт дон. Мый нӧ татшӧм «уна» сьӧмнас керны: керка подув вежны, уджалысьлы мынтысьны либӧ паметь вылӧ кольны тайӧ «дона» кабалаторсӧ?
Ва ямӧм бӧрын ускӧттьӧӧ веськавлӧм йӧз дорӧ волісны МЧС-ын да районса администрацияын уджалысьяс. И кыдзи найӧ вермисны донъявны воштӧмсӧ, кор ваыс вӧлi нин лэччӧма да позис керкаӧдз воны гожся кӧмӧн?
Миянӧс майшӧдлӧ, мый сьӧма отсӧгыс йӧзлы воис эз ӧтмында. А кытысь чина йӧз вермисны тӧдны, кодлӧн ыджыд-ӧ лои ойдлӧмысь воштӧмыс? Синва петмӧн шог, мый позьӧ вӧчны та ыджда отсӧгнас?..
Гозйӧн олысьяслы кокньыдджык на: мужичӧйыд кутшӧмкӧ да вын, кӧть и 70 арӧс нин тыртӧ. А ӧд миян пӧвстын эмӧсь ӧтка нывбабаяс. Та дорӧ содтам, мый Валентина Ивановна Ивашева 10 лун(!) абу вермӧма петавны гортсьыс, посводзас ваыс коскӧдзыс вӧлӧма да.
Пыдди пуктана чина войтыр, корам тiянӧс нӧшта ӧтчыдысь аддзысьлыны миянкӧд, бурджыка ставсӧ видзӧдлыны да вӧчны лӧсялана кывкӧртӧд! Кутам на лача тіян отсӧг вылӧ.
Валентина Ивановна Ивашева, Татьяна Ивановна Иванова,
Валентина Михайловна да Иван Фёдорович Надточейяс,
Евгения Николаевна и Иван Иванович Ивашевъяс,
Александра Михайловна да Александр Юрьевич Калистратовъяс.
Кӧрткерӧс р.