Юлия Корецкая да Захар Некрасов мӧдӧд во велӧдчӧны искусство гимназияын. А локтісны сэтчӧ 7-ӧд классӧ. Окота лои тӧдмавны, кыдзи мамъясныс донъялӧны ныв-пиыслысь выль школаӧ вуджӧмсӧ, быдса во сэні велӧдчӧмсӧ. И со мый найӧ висьталісны.
Ачыс нин сьӧкыдлунсӧ венас
Меным зэв долыд, мый Юля велӧдчӧ искусство гимназияын. Дерт, мамыдлы вель жаль лэдзны ас дорсьыс нывтӧ. Быд лун бӧрда вӧлі…
Вежон кост мысти волывлі карӧ да пыр юавлі Юлялысь: «Мунам бӧр гортад?». А сійӧ век вочавидзліс меным: «Огӧ, меным тані ёна кажитчӧ». И сьӧлӧм вылын лоліс кокни, ӧд тӧда, мый кагалы гимназияын лӧсьыд.
Ме и ачым зэв нин важӧн, 1986 воын, локті татчӧ велӧдчыны. Сэки велӧдчаніныс 2-ӧд номера школа-интернатӧн на шусис. И пыр такӧда ачымӧс: «Вика, Юляыдлы ӧд дас куим арӧс нин. Ачыс нин вермас став сьӧкыдлунсӧ венны!».
Меным кӧкъямыс арӧс вӧлі, кор локті юркарӧ велӧдчыны. Ок, мыйта синва вӧлі кисьтӧма! Но ӧні ньӧти ог жалит. Гимназияыс петкӧдӧ миянӧс ыджыд олӧмӧ, олӧмыслысь сюрӧссӧ индӧ. Эска, нылӧй оз янӧд менӧ, а сӧмын нимкодьӧдас аслас вермӧмъясӧн.
Виктория Корецкая.
Нинӧмысь оз ӧтдортчыны
Велӧдчан воыс кӧть и виччысьтӧма дженьыдӧн лоис, но чукйӧн тыр вӧлі быдсикас лоӧмторнас. Веськавны искусство гимназия кодь школаӧ – тайӧ зэв тӧдчанатор. И меным нимкодь, мый пиӧй, Захар Некрасов, кутіс велӧдчыны гимназияса театр юкӧнын.
Сьӧлӧм сертиыс-ӧ сылы сэні? Да! Водза-водз вӧлі быд лун чеччӧ да котӧрӧн котӧртӧ сэтчӧ. Урокъяс дырйи мед и абу медбур велӧдчысь, но «театралка» йылысь сёрниӧ волам да, пыр и ӧзъясны синъясыс.
Мый менам вежӧрӧ колис тайӧ восьыс?
Дыр ковмас лыддьӧдлыны. Медводз – кутшӧм мичаӧсь вӧліны миян челядь концертасян заллӧн сцена вылын, кор найӧс «пыртісны» гимназистъясӧ – ставныс югыдгӧрд-кольквиж галстукаӧсь. Сэтшӧм жӧ мичаӧсь вӧліны и «Чомӧр» гаж дырйи – петкӧдчисны сэки град выв пуктасъясӧн.
Миян арлыдалӧн – асланым сьыланкывъяс. И гуманитарийясӧ да театралъясӧ «пыртігӧн» челядьным сьылісны «миянлысь» сьыланкывъяс – таӧн сьӧлӧмӧс быттьӧ выйӧн мавтыштісны.
Кажитчис и: мый кӧть оз котыртны гимназияын, ныв-пиным нинӧмысь оз ӧтдортчыны, быдлаӧ нырсӧ сюйӧны. Со Выль во водзын Лыммортӧ пасьтасьлісны, кызвыныс «Наследие» корсьысян отрядӧ вӧзйысисны, коммунаръяслӧн сбор вылӧ волісны и КультProЧтения дырйи кывбур-висьтъяс лыддисны. Бать-мамлӧн чукӧртчылігӧн Груффало йылысь мойд петкӧдлісны – дзик нин артистъяс.
Велӧдчан во чӧжыс Захарлӧн класскӧд ме нуӧді «Прогулка по Сыктывкару» спецкурс, котыртлывлі юркарті экскурсияяс, ӧтлаын гижалім пасйӧдъяс – «Блокнот нетипичного сыктывкарца». Ваня, Вика, Витя да Захар ветлісны мекӧд тӧвся походӧ. Эз повзьыны. Мӧдӧдчисны. Палаткаын узисны. Чайті, налы сьӧкыд лоас, но шуисны, мӧдысь пӧ ветлам на. Со кутшӧмӧсь найӧ!
Заводитчис выль велӧдчан во. И стӧча тӧда, мый ми унатор на ӧтлаын вӧчам.
Людмила Игушева.