Сентябрь 1 лунӧ Сыктывкарын «Орбита» микрорайонса выль школаын медводдзаысь триньгис звӧнок. Тані мӧдас велӧдчыны 1.200 ныв-зон. Татчӧ вуджисны Пушкин нима гимназияысь 5-11 классъясын велӧдчысьяс, а сідзжӧ «Орбитаса» 25-ӧд да 26-ӧд номера школаясысь челядь.
Гимназиялысь выль корпуссӧ восьтыны локтісны Коми Республикаса юралысьлысь удж вӧчысь Владимир Уйба, велӧдан, наука да том йӧзлӧн политика кузя министр Наталья Якимова, Сык-тывкарса мэр Наталья Хозяинова да юркарса сӧветӧн веськӧдлысь Анна Дю. Лӧз лентасӧ вундісны регионӧн веськӧдлысь Владимир Уйба да гимназияса директор Лариса Гладкова.
Пытшкас ыджыд гӧсьтъясӧс виччысисны гимназияын ӧнія велӧдчысьяс да уна во сайын нин сійӧс помалысьяс, велӧдысьяс, бать-мам.
–Став дум-кӧсйӧмсӧ олӧмӧ пӧртӧны йӧз. И талун збыльмисны гимназиялы выль стрӧйба кыпӧдӧм йылысь велӧдысьяслӧн, челядьлӧн да бать-мамлӧн мӧвпъясыс. Аттьӧ налы, кодъяс вӧчисны проектсӧ, кыпӧдісны да краситісны-баситісны тайӧ школасӧ. Татчӧс велӧдчысьяслы сиа босьтны зумыд тӧдӧм-лун. Тайӧ зэв сьӧкыд удж, но тӧдӧмлуныд ковмас водзӧ олӧманыд. Велӧдчигӧн нинӧм оз ков кольны аски кежлӧ. Кыдз позьӧ унджык колӧ вӧчны талун. Дона велӧдысьяс, тіян медшӧр мог – радейтны челядьӧс, сетны налы тӧдӧмлун. Бур туй! – чолӧмаліс ставнысӧ Владимир Уйба.
Наталья Якимова тшӧтш бур сиис да сетіс Лариса Гладковалы гимназияыслысь медшӧр документ – лицензия.
–Миян челядьлы да велӧдысьяслы вичмис зэв мича да кыпыд школа, и ме эска, мый сійӧ лоас республикаын да тшӧтш и Россияын медбуръясысь ӧтиӧн, – эскӧдіс Наталья Хозяинова да козьналіс гимназиялы Сыктывкар йылысь сӧмын на йӧзӧдӧм небӧг.
Ветымын во сайын Пушкин нима гимназияын, а сэки 14-ӧд номера на школаын, велӧдчылӧма ӧні нин биология наукаса доктор, профессор, Чернобыльса АЭС-ын неминуча бырӧдысь Владимир Зайнуллин.
–Выль школа йылысь ми сэки нин мӧвпалім. И ме зэв ёна кӧсъя, медым велӧдысьяс да велӧдчысьяс вужйӧдасны тані став бурсӧ, мый вӧлі важся 14-ӧд номера школаын, – бур тӧдӧмлун, опыт да аскиа лунӧ эскӧм, – висьталіс сійӧ.
Збыльысь, эм мый видзӧдлынысӧ. Быд кабинетын интерактивнӧй маркерӧн гижасян дӧска, документ-камераяс да мукӧд аппаратура. Квайт мобильнӧй классын сулалӧны 3D-принтеръяс, плоттеръяс. Лыдпаса лабораторияын позьӧ нуӧдны быдсикас эксперимент. Челядь вермасны чукӧртны весиг роботӧс. Эм и астропланетарий, телескопъяс, «кодзула енэж» да с.в.
Тані стрӧга мӧдасны видзӧдны челядьлӧн дзоньвидзалун бӧрся. Школаас эм некымын медицина кабинет, на лыдын стоматология, уколасян да медосмотр нуӧданін.
Физкультура урок позьӧ нуӧдны ыджыд спортзалын. Эмӧсь и единоборство велӧдан да тренажёра залъяс, хореография класс, искусственнӧй эжаӧн вевттьӧм ордымъяса стадион, футболӧн да баскетболӧн ворсанінъяс.
Нуръясьны челядь мӧдасны 400 морт вылӧ артыштӧм столӧвӧйын.
Школа дорас жӧ кӧсйӧны лӧсьӧдны машина сувтӧданін.
Ыджыд гӧсьтъяс пыраліс-ны 11-ӧд классын велӧдчысьяс дорӧ. Владимир Уйба пасйис, мый зэв бура гӧгӧрвоӧ гимназия помалысьяслысь майшасьӧмсӧ. Ӧд сылӧн нылыс тшӧтш помалӧма школа да пырӧма велӧдчыны МГУ-са журфакӧ.
Регионӧн веськӧдлысь тайӧ асылӧ тэрмасис Орджоникидзе улича вылын Пушкин нима гимназиялӧн корпусӧ, кӧні велӧдчӧны начальнӧй классъясысь челядь. Сэтчӧ жӧ, 1-ӧд да 4-ӧд классъясӧ Владимир Уйба нуӧдӧма ассьыс пиянсӧ.
–Тайӧ луныс меным зэв тӧдчана. Челядь чеччисны квайт час асылын. Майшасисны жӧ, оз на тӧдны вӧлі да, мый найӧс виччысьӧ выль коллективын, – висьталіс Владимир Уйба.
Кыдз юӧртіс регионӧн веськӧдлысь, таво сентябрь 1 лунӧ, республикаса велӧдчан учреждениеясӧ, детсадъяссянь вузъясӧдз, локтӧма 191 сюрс ныв-зон.
«Орбитаса» выль школаын талун 800 гӧгӧр велӧдчысь, та вӧсна бать-мамлы позьӧ на шыӧдчыны, медым инавны сэтчӧ челядьнысӧ. Та кузя юӧрсӧ позьӧ аддзыны ӧтуввезйын Пушкин нима гимназиялӧн сайтысь.
Николай Размыслов.
Снимокъясыс авторлӧн.