Сентябрь 6 лунӧ ассьыныс профессиональнӧй праздник пасйӧны мусир-биару перъян да ломтас промышленносьтын зільысьяс: кывкутысь, смел, бур тӧдӧмлуна да ыджыд сяма войтыр, кодъяс оз повны сьӧкыдлунысь ни омӧль поводдяысь. Найӧ вежонъясӧн олӧны семьясьыныс ылын, но сы пыдди и матыссаяссьыс гажныс ёнджыка бырӧ. А воӧм мыстиыс сэсся горт овмӧсаныс удж-ноксӧ кык пӧвста бергӧдӧны.
Изьва районса Діюрысь Сергей Ануфриев 15 во нин зільӧ «ЛУКОЙЛ-Коми» мусир перъян котырын операторӧн. Уджыс эськӧ вахтаӧн ветлӧмӧн лыддьыссьӧ, но Сергейлы мойвиӧма – гортас волывлӧ. Уджъёртъясыс олӧны Щельяюрын, а найӧс машинаӧн новлӧдлӧны местаӧдзыс да, Діюр сикт пыр муніганыс босьтӧны тшӧтш Сергейӧс. Аслыс сылы уджыс воӧ сьӧлӧм вылас – кык вежон зільӧ, кыкӧс – шойччӧ. А гортас сылӧн – радейтана гӧтыр да куим мусаник ныла-пиа.
Прӧст кадӧ Сергей окотапырысь фотографируйтӧ: чужан муыслысь, войвывса вӧр-валысь аслыспӧлӧс мичсӧ зільӧ петкӧдлыны. Изьва районын да республика пасьталаын нин Сергей нималӧ аслас мичасьыс-мича снимокъясӧн. И збыльысь, шензьӧданаӧсь найӧ! «Коми му» газетлӧн матысса петасъясын ми паськыдджыка тӧдмӧдам лыддьысьысьӧс Сергей Ануфриевкӧд.
Инесса ОРЁЛ.