Тулыссянь театрӧ ветлыны эз позь, и миян гажным нин бырис концерт-спектакльысь. Гажтӧмтчӧмаӧсь миянысь, видзӧдысьясысь, и артистъяс.
Мукӧд воын дорысь Сыктывкарын театръяс тӧлысьӧн-мӧдӧн водз восьтісны выль сезонсӧ. Вужвойтырлӧн шылада-драмаа театр август помас нин чукӧстіс миянӧс концерт видзӧдны. Неважӧн театрса асьныс дзоньталӧмаӧсь неыджыд жыр, да сэтчӧ и чукӧртісны коми театр радейтысьясӧс «квартирникасьны». Концертыс сідзи и шусис – «Квартирник», а кодкӧ шмонитыштіс на – «Жырник» пӧ.
Ичӧт жыръяд видзӧдысьыс дас вит морт и тӧрӧ, «сцена» вылын сьылысьясӧдз кинад верман нюжӧдчыны. Но тайӧ и бурджык на вӧлӧма – синсӧ артистлысь аддзан, и сійӧ тэнсьыд аддзӧ, тэ кылан-гӧгӧрвоан сійӧс, и сійӧ аддзӧ, кыдзи донъялан петкӧдчӧмсӧ. Ӧти лов шы тіянӧс ӧтувтӧ…
А юргисны «Квартирникын» сьыланкывъяс, романсъяс, кывбуръяс. Комиӧн и рочӧн. И ставыс – муслун йылысь. Том артистъяслы тайӧ медся ёна лӧсялӧ. Нывъяс – мича платтьӧаӧсь, зонъяс – сьӧд смокингаӧсь, сьыліас – «бабочкаяс».
«Ар – гӧтрасян кад» спектакльлысь нимсӧ пӧ вежны колӧ, «Гожӧм – гӧтрасян кадӧн» шуны – некымын ворсысь гожӧмнас гозйӧдчӧмаӧсь да. А Александр Канев дзик на неважӧн кӧлысясьӧма.
Веськыда кӧ шуны: бур, мый шылада-драмаа театр заводитіс сезонсӧ эз ыджыд спектакльӧн, а ичӧт жырйын концертӧн. Збыльысь ӧд гажтӧмтчим нин ёрта-ёртысь да татшӧм топыд кытшын и окота вӧлі аддзысьлыны..
Снимокыс Людмила ИгушевалӦн.