«Коми войтыр» ӧтмунӧмлӧн Сыктывкарса котырӧн дасьтӧм «Спорт – Ёрт!» уджтасыс шедӧдіс юркарын социальнӧй проектъяслӧн конкурсын грант.
Тайӧ уджтасыс серти шуӧма рочӧн да комиӧн дасьтыны спортӧ да дзоньвидза оласногӧ ышӧдана соцреклама. Котыртласны и юркарса том йӧз пӧвстын ЗОЖ-лы сиӧм слоганъяс дасьтан конкурс.
Проектас урчитӧма тшӧтш мукӧд конкурсъяс, реклама кузя специалистъяскӧд аддзысьлӧмъяс, юркарын уналаын ӧшласны ывлавывса баннер-билбордъяс да с.в. Уджтас сертиыс вӧзйӧмъясӧн да кывкӧртӧдъясӧн позяс тӧдмасьны и котырлӧн ӧтуввезса соцсетьын лист бокъясас. Медбуръяссьыс дасьтасны ӧкмыс билборд да дзоньвидза оласноглы сиӧм открытка-стикеръяс.
«Спорт – Ёрт!» проектыс сетӧ позянлун водзмӧстчысь томуловлы висьтавны-юксьыны-петкӧдлыны спорт вылӧ ассьыныс видзӧдлассӧ. Таысь кындзи отсавны лӧсьӧдны республикаса кык государственнӧй кыв вылын ывлавывса реклама.
Проектнас «Коми войтырын» водзмӧстчысьяс кӧсйӧны висьтавны, мый налы абу веськодь республикалӧн да юркарлӧн аскиа луныс. А такӧд тшӧтш чуксалӧны и мукӧдӧс пырӧдчыны конкурсъясӧ.
Уджтассӧ збыльмӧдасны тавося август-декабрь тӧлысьясӧ. Сійӧ отсалас ёнмӧдны «Коми войтыр» ӧтмунӧм да Сыктывкарса администрация костын йитӧдсӧ.