Кольӧм воясӧ «Кувлытӧм полклӧн» радъясын эз этшаӧн нуны кианыс Айму вӧсна Ыджыд тышын усьӧм салдатлысь снимок, кӧні индӧма сылысь сӧмын чужан лунсӧ, тӧлысьсӧ да восӧ.
–Ми ог тӧдӧй, кор да кӧні пуктіс юрсӧ пӧльным, батьным, вокным, – майшасьӧны татшӧм снимокъяссӧ нуысьяс.
И збыльысь ӧд, Россияын уна миллион семьяын ӧнӧдз нинӧм оз тӧдны Айму вӧсна вир кисьтана
Ыджыд тышын усьӧм да юӧртӧг вошӧм матыссаяс да рӧдвуж йывсьыныс, кӧть эськӧ, кыдз тыдовтчӧ, кытчӧ сӧмын абу шыӧдчылӧмаӧсь такӧд йитӧдын.
Фронт вылын юӧртӧг вошӧмаяслысь туйпомсӧ туялӧм могысь жӧ дасьтӧма «Установление судеб погибших без вести защитников Отечества» проект, кодӧс збыльмӧдӧны «Йӧзкостса уджтас» фондын зільысь-водзмӧстчысьяс да налы отсасьысьяс Россияын медся тӧдчана архивъясын уджалысьяскӧд ӧтвылысь.
Асланыс торъя методика вылӧ подуласьӧмӧн найӧ корсьысьӧны ӧтуввез пасьталаын, а сідзжӧ суйӧрсайса архивъясын.
2020 вося мартсянь заводитіс уджавны ставроссияса шӧрин, кытчӧ отсӧгла позьӧ шыӧдчыны Айму вӧсна Ыджыд тышын усьӧмаяслӧн рӧдвужыслы.
Та могысь жӧ лӧсьӧдӧма «Найти солдата» онлайн-сервис. Ӧтуввезйын poisk.proektnaroda.ru сайтын пасйысьӧмӧн быдӧнлы позьӧ мынтысьтӧг пыравны тайӧ сайтас.
А кодлӧн абу татшӧм позянлуныс, вермас звӧнитлыны «Йӧзкостса уджтас» фондлӧн «веськыд йитӧда» 8-800-300-68-97 номера телефон пыр.