Август 15 лунӧ Кулӧмдін районса «Мишкин лес» шойччан базаын «Бипур» сьылан рыт вылӧ чукӧртчылісны бардъяс.
Кыдзи висьталіс сійӧс котыртысь Анастасия Вологжанина, татшӧм аддзысьлӧмсӧ нуӧдны мӧвпсӧ «пӧжӧма» дыр нин, и со таво пӧ смелмӧдчи, да артмис.
–Кӧть медводдзаысь на котыртлім, йӧзыс ошкисны водзмӧстчӧмсӧ да окотапырысь пырӧдчисны аслыспӧлӧс ичӧтик фестиваляс.
Гитараӧн та мында ворсысьсӧ весиг эг виччысьӧй. Локтісны дас квайтӧн: унджыкыс Сыктывкарысь, мукӧдыс ас районысь. Комиыс уна вӧлі и, – юксис Анастасия. – Рытыс артмис шоныд да ёрта. Гитаристъяс ворсісны, видзӧдысьяс накӧд тшӧтш сьылісны, ёна клопайтісны.
Рыт вылӧ волысьяс пӧвстын вӧліны весиг Сочиысь гӧсьтъяс, а ӧти зон Ухтаысь автостопӧн воӧдчис миянӧдз.
Видзӧдысьяссянь козиныс вичмис Кулӧмдін районса Носимысь Анатолий Николаевич Турьевлы.
Концерт бӧрын ставӧн чукӧртчим бипур дорын. Кызвыннас юргисны рок сьыланкывъяс.
Буретш август 15 лунӧ Виктор Цойлӧн кулӧмсяньыс 30 во тырис да, дерт, и сылысь творчествосӧ казьтыштім.
Тӧдчис, мый ставӧн дасьтысьӧмаӧсь, весиг песенник сьӧрсьыс босьтӧмаӧсь.
Бипур дорын пукалысьяслӧн ставныслӧн нимкодьысла синмыс ӧзйис, важӧн нин кӧсйӧмаӧсь тадзи чукӧртчывны да. Ӧти кывйӧн, рытыс артмис.
Водзӧ вылӧ, гашкӧ, сэсся и быдса фестиваль нуӧдны ырыштчылам, – кывкӧрталіс Анастасия Вологжанина.
«Бипур» йылысь казьтылӧмӧн юксис и рытйысьнысӧ ветлысь Виктория Пименова:
–Меным важӧн нин вӧлі окота татшӧм гитараа рыт вылас шойччыштны. Ачым ворсышта жӧ эськӧ, но важӧн нин гитарасӧ киӧ эг босьтлы да, сцена вылас эг пет. Кӧть эськӧ бӧрыннас и гӧгӧрвои, мый ставӧн ворсісны-сьылісны коді кыдзи сяммис да вермис. Тайӧн и лои гажыс быдӧнлы матысса. «Мишкин лесын» сцена вылӧ петалісны и челядь, и верстьӧ йӧз, и пенсионеръяс. Медшӧр козиныс весиг медся олӧма гитаристыслы вичмис.
Зэв бур, мый Анастасия чукӧстіс йӧзсӧ, ӧд базаас сідз и кыскӧ бипур дорын гитараӧн ворсыштны. Ковмас, буракӧ, аслам инструментысь буссӧ чышкыны да волыны мӧд во ворсыштны-сьылыштны сцена вывсянь нин. Настялы тай кӧсйыси-а..