Коронавирус вӧсна тавося мартсянь челядь велӧдчисны ӧтуввез пыр. Школаяс кындзи пӧдласисны и содтӧд тӧдӧмлун сетан учреждениеяс, быдсикас кружок-секция, ясли-садъяс. Но ӧд бӧръяясас ветлӧмысь бать-мам вештӧны сьӧм. Колӧ-ӧ тайӧс вӧчны, челядьлы кӧ бара ковмас пукавны гортын? Мый колӧ кутны тӧд вылын, медым татшӧм услугасьыс мынтысигӧн эз торкавны сідз шусяна потребительлысь правосӧ? И воссясны-ӧ локтан велӧдчан воын школаяс, детсадъяс да содтӧд тӧдӧмлун сетан учреждениеясыс?
Тайӧ да мукӧд юалӧм вылӧ август 13 лунӧ республикаса юралысьлӧн Общественнӧй приёмнӧйын «веськыд йитӧда» телефон пыр сёрнитігӧн вочавидзисны Комиын Роспотребнадзорса да Сыктывкарса администрацияысь чинаяс.
Код тӧдас,
мый лоӧ аски…
–Кыдз вештысьны содтӧд тӧдӧмлун босьтӧмысь, гӧгӧрвоӧдӧ 2013 воын вынсьӧдӧм 706-ӧд номера постановление, – висьталіс Роспотребнадзорлӧн Коми управлениеысь отделӧн веськӧдлысьӧс вежысь Татьяна Гарманова. – Сы серти медшӧр документӧн, коді дорйӧ потребительлысь правосӧ, лоӧ сёрнитчӧм. Татшӧм кабаласӧ кырымалӧны, кор кагаӧс вайӧдӧны секцияӧ, кружокӧ, курсъяс вылӧ. Гӧгӧрвоана, тайӧс вӧчтӧдз колӧ сёрнитчӧмсӧ зэв сюся лыддьыны. Сэні быть пасйӧны, дыр-ӧ сійӧ лоас вына, урчитӧм каднас кутшӧм тӧдӧмлунъяс сетасны челядьлы. Бур, пасйӧма кӧ, кор да кыдзи позьӧ бӧр косӧдны мынтӧм нин сьӧмсӧ.
Таысь кындзи колӧ тӧдмавны, мыйсяма тайӧ учреждение, эм-ӧ сылӧн челядьӧс велӧдӧм вылӧ лицензия да государственнӧй аккредитация, кутшӧм номераӧсь, коді, кор да дыр-ӧ кежлӧ сетіс найӧс. Бур, юӧртасны кӧ, кутшӧм педагогъяс, тренеръяс мӧдасны уджавны дзолюкъяскӧд. Тыдовтчас кӧ, мый ылӧдлӧны, позьӧ норасьны Роспотребнадзорлӧн регионса управлениеӧ.
Кыдз юӧртіс Татьяна Ивановна, таво на дорӧ шыӧдчылӧма 12 морт. Унджыкыс буретш юасьӧмаӧсь, мый вӧчны, пандемия вӧсна кӧ пӧдлалісны кружок-секциясӧ.
Комиын Роспотребнадзорса чинаяс вӧзйӧны содтӧд тӧдӧмлун сетан учреждениеясӧн веськӧдлысьяслы бать-мамкӧд сёрнитчӧмсӧ кырымавны сӧмын тӧлысь кежлӧ да тайӧ кадколастсьыс и вештысьны, мед эпидемия боксянь виччысьтӧм вежсьӧмъяс дырйи оз ковмы бӧр косӧдны сьӧмсӧ. Немтор кӧ оз вежсьы, сёрнитчӧмыс лоӧ вына и локтан тӧлысяс да и водзӧ, вӧчасны сідз шусяна пролонгация да. Сэк жӧ программасӧ дасьтігӧн колӧ артыштны, медым, ковмас кӧ, позис босьтчыны велӧдны челядьӧс ӧтуввез пыр.
Быд кагалы – 2 м2
–Роспотребнадзор вӧзйӧ детсадйын челядьлысь группаяссӧ котыртны сідз, медым вежӧсас быд кага вылӧ воис кык квадратнӧй метр, а дзолюклы кӧ абу на куим арӧсыс – кык да джын «квадрат», – висьталіс Роспотребнадзорлӧн Коми управлениеысь главнӧй специалист-эксперт Татьяна Винницкая. – Артмӧ, яслиын кызь вит морта группалы колӧ 62,5 квадратнӧй метр ыджда вежӧс. Та дырйи ог арталӧй воспитательясӧс да няняясӧс. Кыдзи юклыны группаяссӧ, найӧс кӧ котыртлісны водзджык, да ӧнія нормаяс серти оз тӧрны вежӧсас, ковмас мӧвпыштны ясли-садйӧн веськӧдлысьяслы.
Таысь кындзи быд асыв детсадйӧ пыригӧн дзолюкъяслысь да верстьӧлысь мӧдасны мерайтны температурасӧ, быд группаын быть ковмас лӧсьӧдны рециркулятор – бактерия виан аппарат, а луннас некымынысь мыськавны-чышкавны вежӧсъяссӧ асептика ваӧн.
Талун Сыктывкарса детсадъясын уджалӧ квайтымын гӧгӧр дежурнӧй группа. Сентябрь 1 лунӧ, некутшӧм виччысьтӧмтор кӧ оз ло, воссяс став дошкольнӧй учреждениеыс. Роспотребнадзорса да ясли-садйын зільысьяс шыӧдчӧны бать-мам дорӧ, медым эз дӧзмыны коронавирус висьӧмысь видзчысян татшӧм мераяссьыс. Ӧд ставыс тайӧ вӧчсьӧ челядьлысь дзоньвидзалунсӧ видзӧм могысь.
Звӧнокыд оз кут зильгыны
Татьяна Винницкая сідзжӧ юӧртіс, кыдзи сентябрь 1 лунсянь во помӧдз мӧдасны уджавны школаяс.
–Став велӧдчан учреждениеыс воссяс. Но коронавирусысь видзчысьӧм вӧсна унатор сэні вежсяс, – висьталіс Татьяна Анатольевна. – Санитария боксянь воддза индӧд-корӧмъяс дорӧ COVID-19 содтіс выльясӧс, кодъясӧс вынсьӧдӧма СанПиН-ын тавося июнь 30 лунӧ.
Гӧгӧрвоана, тӧдӧмлунлы сиӧм уна йӧза гажыс оз ло. Сентябрь 1 лунӧдз быд школаын краситчӧм-баситчӧм да дзоньтасьӧм-идрасьӧм кындзи вӧчасны сідз шусяна дезобработка, ставсӧ мыськасны-чышкасны асептикӧн. Велӧдчысьяс да налӧн бать-мамныс вежсьӧмъяссӧ казяласны школаӧ пыртӧдзныс на. Кыдзи и сад-яслиын, быдӧнлысь мерайтасны температурасӧ. Сійӧ кӧ 37 градусысь вылынджык, велӧдчысьӧс бӧр бергӧдасны гортас, а бӧртиджык школаас лэдзасны, сьӧрсьыс кӧ ваяс бурдӧм йылысь справка. Температура мерайтны абу сьӧкыд, школаас кӧ челядьыс этша. А уна кӧ, татшӧмас восьтасны некымын ӧдзӧс, медым велӧдчысьяс эз сёрмыны урок вылӧ.
Школаын коронавирус паськалӧмысь видзчысьӧм могысь жӧ асывнас челядьӧс велӧдны заводитасны оз ӧти кадӧ. Шуам, первой, коймӧд, витӧд да сизимӧд классаяс пуксясны парта сайӧ кӧкъямыс часын. Дас вит минут мысти урокъяс заводитчасны мӧдӧд, нёльӧд, квайтӧд да кӧкъямысӧд классъясын. Нӧшта дас вит минут мысти локтасны ӧкмысӧд, дасӧд да дас ӧтиӧд классысь ныв-зон. Позьӧ юклыны и мӧд ног – ичӧт, шӧр да гырысь арлыд серти. Сэк жӧ колӧ кутны тӧд вылын челядь лыдсӧ, кымын сменаӧн найӧ велӧдчӧны да с.в.
Велӧдчысьяс лунтыр кутасны пукавны ӧти классын, велӧдысьяс мӧдасны волывлыны на дорӧ. Сӧмын физика, химия, биология да физкультура урокъяс кутасны нуӧдны торъя кабинетъясын да спортзалын.
Челядьлы да велӧдысьяслы маскаяс оз ковны. Но маска-перчаткиасьны быть ковмас пусьысь-пражитчысьяслы. Кыдзи и водзті, челядьӧс кутасны вердны пӧсь сёянӧн. Но сы вӧсна, мый быд класслӧн урокыс заводитчӧ да помасьӧ оз ӧти кадӧ, челядьлы нуръясьны ковмас урчитӧм жӧ кадӧ, а столӧвӧйӧ пыртӧдз кисӧ быть мыськыны майтӧгӧн да асептикӧн.
Дерт, татшӧм ногӧн велӧдчигӧн урокъяс кутасны помасьны сёрӧнджык. Нӧшта на «вешъяс» и мӧд смена. Ӧд унджык школаас сійӧ эм на. Но Роспотребнадзорса специалистъяс ӧлӧдӧны, челядьӧс велӧдны пӧ позьӧ сӧмын кӧкъямыс час рытӧдз.
–Ковидысь видзчысян санитарнӧй правилӧясын индӧма, классын быд велӧдчысь вылӧ мед вӧлі артыштӧма кык квадратнӧй метрысь абу этшаджык. Артмӧ, ӧти классын позьӧ велӧдны сӧмын 15-20 мортӧс. А миян школаясын классас велӧдчысьыс кык пӧв унджык. Школаса директоръяслӧн ӧні юрныс висьӧ, кыдзи пуксьӧдавны челядьӧс, – пырӧдчис сёрниӧ Сыктывкарса администрацияысь контрольно-ревизионнӧй удж юкӧнӧн веськӧдлысь Татьяна Габова. – Дерт, столӧвӧйын, коридоръясын, классъясын сувтӧдаласны рециркуляторъяс. Кадысь кадӧ став вежӧссӧ мӧдасны тӧлӧдны. Гӧгӧрвотӧм на, мый челядь мӧдасны вӧчны перемена дырйи: пукавны классын, али найӧс петкӧдасны ывла вылӧ. Ӧд вильышпозъясыд инас оз ӧшйывны, а орчча классъясын мунӧны на урокъяс. Бур, ӧні поводдяыс шоныд на. А мый вӧчны тӧвнас?
Коронавирусысь видзчысьӧм понда жӧ школа воштас зэв коланатор, кодлы весиг сиӧмаӧсь сьыланкывъяс да кывбуръяс. Шуӧма дугӧдчыны звӧнокысь. Мӧдарӧ, сійӧ мӧдас юргыны-зильгыны быд дас вит минут мысти, и гӧгӧрвотӧм лоӧ, кодлӧн помасьӧ урокыс, а кодлӧн заводитчӧ…
Сьывны позьӧ и шойччан лун
Роспотребнадзорлӧн индӧдъясысь шемӧсӧ воӧмаӧсь и содтӧд тӧдӧмлун сетан учреждениеясын зільысьяс.
–Ог тӧд, кыдз мӧдам уджавны водзӧ, кодӧс велӧдны. Ӧд унатор школа сайын. Мӧдасны кӧ сэні велӧдны кӧкъямыс час рытӧдз, коді локтас миян дорӧ? – майшасьӧ Сыктывкарысь челядьлӧн музыкальнӧй школаӧн веськӧдлысь Ольга Вяхирева.
Кыдзи и школаын да сад-яслиын, содтӧд тӧдӧмлун сетан учреждениеясын, тшӧтш и музыкальнӧй школаын, быдӧнлысь мӧдасны мерайтны температура, быд кагалы колӧ вичмӧдны кык квадратнӧй метр ыджда велӧдчанін, став вежӧссӧ да эмбурсӧ мыськавны-чышкавны асептикӧн, сувтӧдны рециркуляторъяс да кыдз позьӧ ёнджыка торйӧдны челядьӧс ӧта-мӧдсьыс.
Ольга Вяхиревалӧн висьталӧм серти, позьӧ на кыдзкӧ велӧдны кагаӧс ӧткӧн сьывны, кутшӧмкӧ инструментӧн ворсны. А мый вӧчны хорын сьылысьяслы да ансамбльын ворсысьяслы?
Ольга Владимировналы вочавидзис Роспотребнадзорлӧн Коми управлениеысь отделӧн веськӧдлысь Александр Рымарь. Сылӧн висьталӧм серти, содтӧд тӧдӧмлун сетан учреждениеяслы позьӧ уджавны челядькӧд шойччан лунъясӧ, праздник да каникул дырйи. А медся ичӧт дзолюкъяслы кружок-секция восьтӧмӧн колӧ пӧ нӧрӧвитлыны на.
Николай Размыслов.