Сентябрын бӧрйысьӧмӧдз коли тӧлысь. Он и тӧдлы, ковмас мунны бӧрйысян участокӧ да дӧверитны ассьыд олӧмтӧ налы, кодъяс чайтӧны, мый медбура тӧдӧны, кыдз вӧчны сійӧс нӧшта на бурджыкӧн.
Водзынсӧ шулісны, мый бӧрйысьны кутам, кыдзи и пыр бӧръя кадас, сентябрь 13 лунӧ. Но Кремльыдлы зэв ёна сьӧлӧм вылас воӧма, кыдзи таво июльын гӧлӧсуйтім вежон чӧж (кор тай Россияса Оланподулӧ вежсьӧмъяс пыртім), и арнас пӧ бара на позяс гӧлӧстӧ сетны оз ӧти, а быдса куим лун (сентябрь 11-13 лунъясӧ).
Коми Республикаса юралысьысь ӧтдор пондам бӧрйыны тшӧтш и Каналан Сӧветса депутатъясӧс. Госсӧветад ставыс 30 морт. Джынйыс сэтчӧ пырӧ партийнӧй списокъяс серти, мӧд джынйыс – ӧти мандата кытшъяссянь.
Таво Степан изэрдса джуджыд керкаад пырны окотитысьыс вӧлӧма 85 морт, но кодсюрӧӧс сэсся кутшӧмкӧ помкаяс вӧсна ковмӧма киритны да, кольӧма ӧкмыс партиясянь 75 кандидат да 2 сідз шусяна самовыдвиженеч. Ӧткымын бӧрйысян кытшын ковмас донъявны куим-нёль кандидатпуӧс, а кӧнкӧ и сизимӧс!
Видзӧдлыны кӧ налысь ним-овсӧ Россия Федерациялӧн «Выборы» государственнӧй автоматизируйтӧм тэчасысь (ГАС-ысь), тыдовтчас, мый на пиысь 14-ыс – талунъя депутатъяс, кодъяс нёль во чӧж пӧсь кисьтісны миянлысь олӧм бурмӧдӧм могысь да нӧшта на мӧд сы дыра та могысь кӧсйӧны зільны. Колӧ шуны, пӧшти ставныс найӧ (кык депутатысь кындзи) «Единая Россия» котырысь, коді буретш и «бӧжалӧ» миян странаын. И кольӧмвося декларация сертиныс на пиысь быдӧн нажӧвитӧма 2-5 миллион шайт (ог нин арталӧй му-патера-машинасӧ)…
Мукӧд депутатпуыслӧн ним-овыс, кодъяс мыйлакӧ зэв ёна окотитӧны Госсӧветад миян вӧсна тӧждысьны, ӧдвакӧ мыйкӧ висьталас бӧрйысьысьлы.
Ме тай на пиысь сӧмын Илья Семяшкинӧс тӧда, сійӧ Комиын удж, занятосьт да йӧзӧс социальнӧя дорйӧм кузя министр. Тшӧтш и Юлия Посевкинаӧс, коді веськӧдлӧ «Особое детство» общественнӧй котырӧн. Да нӧшта Алексей Габовӧс, коді веськӧдлӧ «Коми войтыр» ӧтмунӧмӧн. А сэсся, веськыда кӧ шуны, и некодӧс…
Эмӧсь тані со и директор, и юрист, и ас вылӧ уджалысь, и учёнӧй, и пенсионер, и инже- нер, и студент, и уджтӧмалысь… И «Единая Россияысь», и «Справедливая Россияысь», и ЛДПР-ысь, и КПРФ-ысь, и «Коммунисты Россииысь», и «Родинаысь», ачыс асьсӧ вӧзйысь и…
Тӧлысьбыднад, гашкӧ, и удитам на накӧд тӧдмасьыштны. Дерт, ог быдӧнкӧд…
Анжелика Елфимова.