Владимир Уйба ошкис оланінтӧм йӧзлы Сыктывкарын реабилитация шӧрин восьтӧм да налы отсасьӧм могысь водзмӧстчӧм.
Август 10 лунӧ республикаса юралысьлысь удж вӧчысь Владимир Уйба аддзысьліс инвалидъяслӧн «Аппарель» регионса котырӧн да «Пӧт морт» благотворительнӧй уджтасӧн веськӧдлысь Илья Костинкӧд.
Общественник тӧдмӧдіс регионӧн веськӧдлысьӧс оланінтӧм йӧзлы Сыктывкарын реабилитация шӧрин восьтӧм кузя проектӧн.
–Куим во нин отсалам йӧзлы, кодъяс кутшӧмкӧ помка вӧсна дзугсисны олӧмас да воштісны уджсӧ, оланінсӧ. Вердам найӧс пӧсь сёянӧн, иналам удж вылӧ да овмӧдам реабилитация шӧринъясӧ. Миян юрист отсалӧ налы выльысь дасьтыны колана документъяс. Миянлы отсасьӧны волонтёръяс. Татшӧмыс уна. А талун ми кӧсъям восьтыны реабилитация шӧрин. Пикӧ воӧм мортлы сэні сетасны быдсикас отсӧгсӧ. Шӧринас лоасны песласянін, душ, пусянін, олан жыръяс, – висьталіс Илья Костин.
Сылӧн кывъяс серти, налысь водзмӧстчӧмсӧ ошкӧмаӧсь нин юркарса администрацияын. Мелькомбинат дорысь сетӧмаӧсь шогмана стрӧйба. Эм пӧ нӧшта керка, но сы кузя сёрнитчӧны на, медым федеральнӧй эмбурысь вуджӧдісны муниципалитетлы.
Общественник аддзӧма и уджтассӧ збыльмӧдӧм могысь социальнӧй отсӧг сетысьясӧс. На лыдын ас вылӧ уджалысь компанияяс, кодъяс дасьӧсь дон босьттӧг вичмӧдны стройматериал да сьӧм. Кольӧма сёрнитчыны, коді да кыдзи нюжӧдас тайӧ стрӧйбаясас ва, би, шоныд да мукӧд сідз шусяна коммуникация.
–Тайӧ шӧриныс оз ло нӧшта ӧти узьланінӧн. Ми кӧсъям отсавны матӧ воӧм йӧзлы сувтны кок йылас, инасьны удж вылӧ, корсьны оланін да водзӧ лючки овны ас кежаныс. Зіля кӧ босьтчам, во помӧдзыс тайӧ уджтассӧ вермам збыльмӧдны. Ӧд колӧ вӧчны оз нин сэтшӧм унатор, – тӧдчӧдіс Илья Костин.
Сылӧн висьталӧм серти, шӧриныс мӧдас уджавны торъя йӧзсянь, спонсоръяссянь вичмӧдӧм сьӧм да грантъяс весьтӧ кыдз общественнӧй котыр. Ӧні сылы колӧ сідз шусяна юридическӧй статус. Та могысь шыӧдчӧмаӧсь юстиция министерствоӧ. Шӧринсӧ котыртӧм могысь документъясыс сентябрын нин лоасны дасьӧсь. Оланінтӧмъяслы отсасян Коми регионса благотворительнӧй общественнӧй котырыс мӧдас шусьыны «Овны гортын».
–Тайӧ бур да колана уджтас, – пасйис Владимир Уйба. – Ыджыд вермӧмъяс тіянлы да аттьӧ пикӧ воӧм йӧзлы бур вӧчӧмысь. Дерт, мӧда тшӧтш отсавны сійӧс збыльмӧдны и кыдз республикаӧн веськӧдлысь, и кыдз Комиын олысь.