Таво гожӧм Печора районын олысьясӧс матӧ воштӧмаӧсь ошъяс. Найӧ ӧтуввезйын ӧтарӧ йӧзӧдӧны повзьӧдлана видео.
Сідз, «Каджером первый» группаын кольӧм вежонӧ Каджеромысь ӧти нывбаба йӧзӧдӧма, кыдзи варгыль кока легӧдӧ суседыслысь потшӧссӧ. Ош повтӧг шӧйтӧ керка йӧрас да тімбыльтчӧ, тыдалӧ, шойччыштны пес чипас бокас.
Нывбабалӧн кывъяс серти, звер некымын лун нин олӧ бать-мам керка йӧрас да оз и думайт мунны вӧрӧ. Воддза воясӧ пӧ Каджеромӧ волывлӧма жӧ ошкыс, но мед татшӧма кӧзяйничайтны! Сиктсаяс ывла вылӧ полӧны петны. Вермас ӧд косявлыны.
«Каджером первыйын» жӧ йӧзӧдӧмаӧсь видео: сиктса шӧр туйӧд тапикасьӧ пияна ош. Тані жӧ нӧшта мӧд видео, машинасянь снимайтӧмаӧсь, кыдзи ош вуджӧ сиктса туй вомӧн.
А «Типичная Печора» пабликын неуна водзджык ошъяс вылӧ элясисны «Энергия» да «Лесная даль» тӧвариществоясысь дачникъяс. Кы-дзи гижӧ Печораысь Евгений Горбушин, бать-мамыс гожйӧны дачаас. Град йӧрас пӧ петавны полӧны, ошкыс уна да. Некодысь пӧ оз повны, кӧть и видлӧмаӧсь горзӧмӧн да шумитӧмӧн вӧтлыны.
И збыль смелӧсь. «Лесная дальысь» нывбаба тшӧтш йӧзӧдӧма видео. Кылӧ, кыдзи сійӧ кӧртӧ клёнӧдӧ да матькӧ. Но ошлы тайӧ тшаква — сійӧ водӧ град шӧрас.
Пармаса кӧзяинлӧн йӧз оланін дорӧ матыстчӧм йылысь Комиысь вӧр-ва да гӧгӧртас видзан министерствоын тӧдӧны.
Специалистъяс ӧлӧдӧны, мед йӧзыс оз шыблавны сёян коляссӧ сикт-кар бокӧ, да корӧны видзчысьны зверкӧд паныдасьӧмысь. Дерт, йӧзыс тайӧ индӧдъяссӧ оз торкавны. Но вӧрса пемӧсыд минприро-дылысь вӧзйӧмъяссӧ оз лыддьы. Тыдалӧ, веляммӧма нин.
Колӧ пасйыны, вӧр-ва видзан министерствоын ошъяс йылысь быд юӧр кутӧны тӧд вылын.
Министр Роман Полшведкинлӧн кывъяс серти, йӧз оланін дорын пакӧститчысь варгыль кокаясӧс специалистъяс бӧр вӧтлӧны ягӧ либӧ лыйӧны.
А мамтӧг кольӧм пиянӧс кутӧны да мӧдӧдӧны Тверь обласьтса шӧринӧ.
Пасъям, мый «Энергия» тӧвариществоын шӧйтысь ошкӧс минприродылӧн индӧд серти шуӧма лыйны.
Пищальтӧ дасьты!
Сідзжӧ колӧ пасйыны, мый август 1 лунсянь вӧралысьяслы позяс босьтны ош лыйӧм могысь лицензия.
Роман Полшведкинлӧн кывъяс серти, миян республикаын 2020 воын позяс кыйны 384 ош. Воддза воясӧ моз виччысьӧны 200 гӧгӧр шыӧдчысьӧс. Дерт, оз пӧ быдӧнлы мойви, но видлыны позьӧ.
Документъяссӧ позьӧ вӧчны вит ног. Медся ӧдйӧ да кокньыд — август 1 лунӧ гижны шыӧдчӧм gosuslugi.ru портал пыр. Шыӧдчӧмсӧ кӧ ыстан Госуслу-га порталӧ да сэні вештысян, урчитӧм госпошлина доныс чинӧ 30% (650 шайт пыдди ковмас мынтыны 455 шайт).
Мӧд-кӧ, август 3 лунӧ шыӧдчыны вӧр-ва видзан министерстволӧн вӧралан управлениеӧ, Сыктывкарын Интернациональнӧй уличаса 157-ӧд керкаын 33-ӧд жырйӧ. Либӧ шыӧдчыны районъясын тайӧ управлениеса специалистъяс дорӧ. Учреждениеӧ локтігӧн энӧ вунӧдӧй маскаасьны да резина чуня кепысясьны. Тайӧс вӧчны быть колана.
Ош кыян лицензия позьӧ босьтны и МФЦ-лӧн «Мои документы» шӧрин пыр. Шыӧдчӧмъяссӧ управлениеын кутасны регистрируйтны август 3 лунсянь.
Шыӧдчӧмсӧ позьӧ ыстыны и пошта пыр либӧ курьерӧн Коми Республикаса вӧр-ва видзан министерствоӧ татшӧм адрес серти: 167983, ГСП-3, Сыктывкар, Интернациональнӧй уличаса 108-а керка. Вӧралан управлениеын шыӧдчӧмсӧ видлаласны да пасъясны август 3 лунсянь жӧ.
Пасъям, шыӧдчӧмсӧ кӧ ыстан пошта, МФЦ пыр либӧ ваян ачыд, колӧ вештыны 650 шайт госпошлина. Кутшӧмкӧ помка вӧсна кӧ лицензиясӧ оз сетны, сьӧмсӧ позяс бергӧдны минприродыӧ шыӧдчӧмӧн. Либӧ тайӧ сьӧмсӧ видзны мӧд сикас вӧралӧм вылӧ.
Эмӧсь кӧ содтӧд юалӧмъяс, звӧнитны Сыктывкарын 8 (8212) 20-24-72; 20-09-24; 20-70-14; 20-15-30 телефонъяс пыр.