Июль 26 лунӧ Сыктывдін районса Сёйтыын кыпыда восьтісны спорт площадка да челядьлы ворсанін. Водзмӧстчис найӧс лӧсьӧдӧмын грездса ТОС-ӧн веськӧдлысь Ольга Беляева.
Сёйтыын асывсяньыс вӧлі зэв гажа. Культураын уджалысьяс дасьтӧмаӧсь ворсӧмъяс. Ныв-зон шыблалісны шар да кольча, котралісны, чеччалісны, а сідзжӧ кыйисны чери. А гӧсьтъяслӧн – Комиын ТОС-яс ассоциацияӧн веськӧдлысь Дмитрий Сизевлӧн, АТОС-са уджтасъяс кузя специалист Екатерина Сизевалӧн, Гарйинскӧйын ТОС-ӧн веськӧдлысь Ольга Иващенколӧн да Луздорса ТОС-ӧн веськӧдлысь Алла Незгодалӧн воӧм мысти восьтісны площадкаяссӧ.
Кыдзи висьталіс Дмитрий Владимирович, Ольга Модестовна уна нин вӧчис грездын олӧм бурмӧдӧм могысь. Ань пырӧдчӧ федеральнӧй да регионса тшупӧдын йӧзӧдӧм конкурсъясӧ, шедӧдӧ грантъяс. И та пӧрйӧ бара сылӧн вермӧм. Ӧні сёйтысалы позьӧ вын-эбӧс ёнмӧдны тренажёръясӧн, тшӧтш и дзолюкъясыслӧн лои гажа да мича ворсанін.
–Важӧн нин кӧсйим волыны Ольга Модестовна дорӧ, – шуисны гӧсьтъяс. – Миян республикаын ТОС-яс уджалӧны бура. Но Ольга Беляеваысь писькӧсыс некод абу. Ми сійӧс пыдди пуктам да сиам выль вермӧмъяс.
Чолӧмалана кывъяс бӧрын Сёйтыын олысьяс ставӧн ӧтув вӧчисны зарядка, видлісны тренажёръяс. Медся ичӧтыс вӧлі нёль арӧса Ярослава Вокуева, а медся арлыдаыс – 83 арӧса Валентина Алексеевна Елфимова, коді тшӧтш песыштіс вын-эбӧссӧ тренажёръяс вылын.
Пасъям, 2020 восӧ сиӧма Ыджыд Вермӧмсянь 75 волы. Такӧд йитӧдын сёйтыса да гӧсьтъяс пырӧдчисны «Паметь сад» ставроссияса акцияӧ, садитісны пуяс. А, сідзкӧ, Сёйтыын кутас жӧ шувгыны война вылын усьӧмаясӧс да ветеранъясӧс казьтылан сад.