Россияса правительство торйӧдас 97,1 миллион шайт мынтыны Коми Республикаса бурдӧдысьяслы компенсация.
Та кындзи федеральнӧй бюджетысь вичмӧдасны сьӧм Комиын челядьлысь поликлиникаяс сӧвмӧдӧм могысь.
–Миян регионлы тайӧ отсӧгыс зэв тӧдчана, – висьталіс Коми Республикаса юралысьлысь удж вӧчысь Владимир Уйба. – Комилысь корӧмъяссӧ пыдди пуктӧмысь кӧсъя аттьӧавны Россияса правительствоӧн веськӧдлысь Михаил Мишустинӧс. Эска, ми и водзӧ кутам ӧтув зільны республикаса войтырлысь олӧмсӧ бурмӧдӧм могысь.
Бурдӧдысьяслы вичмӧдӧм сьӧмсӧ веськӧдасны отпускӧ петысьяслы мынтысьӧм, а сідзжӧ коронавирусӧн висьысьяскӧд уджалысь медикъяслы да мукӧд специалистлы босьттӧм отпусксьыс компенсация вештӧм вылӧ.
–Россияса дас кык регионлы, тшӧтш и Комилы, вичмӧдасны челядьлӧн поликлиникаясын да мукӧд бурдӧдчанінын материально-техническӧй подувсӧ сӧвмӧдӧм вылӧ сьӧм, – пасйис Владимир Уйба.
Бурдӧдчанінъяслӧн тшӧт вылӧ сьӧмсӧ вуджӧдасны август заводитчытӧдз на.