Июль 21 лунӧ Коми Республикаса юралысьлысь удж вӧчысь Владимир Уйба да «Монди Сыктывкарса ЛПК»-ысь генеральнӧй директор Клаус Пеллер кырымалісны регионса правительство да компания костын ёртасьӧм йылысь сёрнитчӧм.

Сэні индӧма, мый 2020 воӧ вӧр комбинат торйӧдас 45 миллион шайт Кулӧмдін, Кӧрткерӧс, Сыктывдін, Луздор, Сыктыв, Удора да Койгорт районъясын (буретш тайӧ муниципалитетъясын заптӧны СЛПК-лы вӧрсӧ) выль уджаланінъяс лӧсьӧдӧм да школа-детсад, культура керкаяс дзоньталӧм вылӧ. Сьӧмыс вичмас и ичӧт да шӧр бизнесын уджтасъяс збыльмӧдны.

—Ми кӧсъям, медым вӧр заптан районъяс сӧвмисны, та вӧсна и могмӧдам найӧс сьӧмӧн. Таысь водзӧсыс воӧ и регионлы, и предприятиелы, — висьталіс Клаус Пеллер.

Республикаса правительстволӧн «Монди Сыктывкарса ЛПК»-кӧд 2019 воӧ кырымалӧм сёрнитчӧм серти компания быд во вичмӧдӧ республикалы 550 миллион шайт. Сёрнитчӧмсӧ урчитӧма 2021 воӧдз.