«Монди Сыктывкарса ЛПК»-ын эштӧдісны збыльмӧдны теплоэлектроцентраль выльмӧдан инвестицияа проектлысь тӧдчана юкӧн: сувтӧдісны кырсьӧн ломтысян выль пӧрт, турбина да вежисны трубаяс. Уджтаслӧн доныс — 135 миллион гӧгӧр евро.
Монди котыр зільӧ уджавны экология вӧсна тӧждысьӧмӧн, и инвестицияа уджтас збыльмӧдӧм бӧрын чадыс сынӧдӧ кутас веськавны 200.000 тоннаӧн этшаджык — а тайӧ Монди котырлӧн став предприятиеӧн сынӧдӧ лэдзан СО2-лӧн 4 прӧчентыс.
—Комбинатын ТЭЦ-лӧн тӧдчанлуныс зэв ыджыд. Коми Республикалы колана электро- энергияысь 20 прӧчентсӧ сетӧ СЛПК-са ТЭЦ, сійӧ жӧ могмӧдӧ Эжваын 60 сюрс олысьӧс шоныдӧн да пӧсь ваӧн, — пасйис «Монди СЛПК»-са генеральнӧй директор Клаус Пеллер. — Инвестицияыс да ыджыд сяма специалистъяслӧн уджыс сетіс миянлы позянлун сувтӧдны ӧнія кадыслы лӧсялана оборудование, медым джӧмдавтӧг вӧчны электроэнергия да могмӧдны комбинатсӧ да эжвасаӧс шоныдӧн, и та дырйи этшаджык тшыкӧдны вӧр-васӧ.
Вӧр комбинатын ТЭЦ-ыс заводитіс уджавны ветымын во сайын. СЛПК паськалӧмкӧд вочасӧн содіс и теплоэлектроцентральлӧн вынйӧрыс. STEP уджтас серти 2010 воын сэні вӧлі сувтӧдӧма содорегенерационнӧй пӧрт, а сёрӧнджык вӧлі шуӧма выльмӧдны теплоэлектроцентральсӧ ставнас.
Ӧткымын кадколастӧ сэні зілис 1.100 мортӧдз, но ТЭЦ выль-мӧдігӧн вӧр комбинатын уджыс эз оравлы.
Проект збыльмӧдігӧн куим важ пӧрт пыдди вӧлі сувтӧдӧма Valmet компаниялысь кырсьӧн да ва весалігӧн кольӧм сорасӧн ломтысян пӧрт. Биаруыс колӧ сӧмын бисӧ пестігӧн. «Турунвиж» энергия вӧчӧм кындзи пӧртыс отсалӧ бырӧдны кырсь-пилипызь. Пӧрт ломтігӧн артмӧм ва руысь выль турбинаын вӧчӧны электроэнергия. Уджтас серти жӧ сувтӧдӧма выль трансформатор.
Коронавируса вуджан висьӧм паськалӧм вӧсна выльмӧдӧм теплоэлектроцентральсӧ кыпыда восьтасны 2020 волӧн мӧд джынйын.