«Коми йӧзӧдчан керка» йӧзӧдліс 2020 вося мӧд во джын кежлӧ гижӧдчан акция. Та пӧрйӧ козинъяс пудъялісны эз сӧмын газет-журнал судзӧдысьяс, но и поштальонъяс пӧвстын. Медшӧр козинсӧ – «TOYS» компаниясянь «Мечта» велосипед – шедӧдіс Кулӧмдінса Скӧрӧдумысь Ольга Викторовна Жангурова. Чолӧмалам!
–Весиг мӧвпыштнысӧ эг куж, мый татшӧм шуд усьӧ меным, – висьталӧ Ольга Викторовна. – Удж вылын велосипедыд – зэв коланатор, ӧд менам борд улын Скӧрӧдум да Кырныша. Кырнышаыс куим километр сайын, а Скӧрӧдум кык километр кузьта. Подӧнтӧ быд лун ёна он ветлӧдлы. Но ӧні менам татшӧм мытшӧдыс абу. Аттьӧ «Коми йӧзӧдчан керкалы» «Гижӧдчӧмысь – козин» акциясӧ нуӧдӧмысь. Аттьӧала и аслам начальник Марина Петровна Воробьёваӧс сэтчӧ пырӧдчыны ышӧдӧмысь.
Ольга Викторовна поштальоналӧ во нин. Чужлӧма Великӧй Устюгын. Сэні жӧ тӧдмасьӧма верӧсыскӧд да локтӧма овны коми сиктӧ. Зэв пӧ тані лӧсьыд: йӧзыс шаньӧсь, вӧр-ваыс мича. Кӧть коминас омӧля сёрнитӧ, да ставсӧ гӧгӧрвоӧ.
–Сиа вужвойтырлы судзӧдны коми газет-журнал. Нимкодь, мый Кырнышаын да Скӧрӧдумын лыддьӧны жӧ коми петасъястӧ. Коми кывтӧ ӧд ставнымлы ӧтув колӧ сӧвмӧдны.
А ми аттьӧалам поштальонъясӧс татшӧм бур да колана уджсьыс – коми газет-журнал вылӧ гижӧдӧмысь.
Екатерина МИКУШЕВА.