Ар – абу сӧмын гӧтрасян, но и бӧрйысян кад.
Сентябрь 13 лунӧ страна пасьталаын бара на кутам бӧрйыны кыдзи посни, сідз и гырысь чинаясӧс, на лыдын – 17 губернаторӧс, тшӧтш и Комиын.
Та пӧрйӧ Степан изэрдвывса «Виж керкаын» «кӧзяинӧн» окотитӧны лоны витӧн: республикаса юралысьлысь удж вӧчысь, самовыдвиженеч Владимир Уйба, КПСС-сянь (Коммунистическая партия социальной справедливости) Петербургысь 38-ӧд номера бӧрйысян комиссияӧн веськӧдлысь Сергей Пономарёв, ЛДПР-сянь Усинскысь ас вылас уджалысь, карса депутат Андрей Никитин, «Зелёная альтернатива» партиясянь ас вылас уджалысь, Сыктывкарын олысь Виктор Бетехтин, КПРФ-сянь – Коми Республикаысь Каналан Сӧветса депутат Олег Михайлов.
Бӧрйысьӧмӧдз колис тӧлысьысь муртса унджык да, кандидатпуясыд ёна нин ыззисны.
Ӧти чукӧртӧ кар-районса депутатъяслысь кырымпасъяс. Мӧд ветлӧдлӧ республика пасьтала, туй-стрӧйбаяс дзоньтавны кӧсйысьӧ да медаль разӧдӧ. Коймӧд «ВКонтактеын» лист бокас ассьыс партиясӧ ошкӧ. Нёльӧд эскӧдӧ, мый бӧр вайӧдас миянӧс социализмӧ да Брежнев кадся шудӧ. А витӧдыс… А витӧдыс вӧзйӧ Сыктывкарын вежны Карл Маркс уличалысь нимсӧ!
Кандидатпулӧн кывъяс серти, Карл Батьковичыд пӧ Комикӧд некыдзи абу йитчӧма. Сы пыдди пӧ юркарса тайӧ медся важ уличаыслы колӧ сетны Алексей Терентьевлысь нимсӧ.
Алексей Иосифович чужлӧма Изьва районса Красноборын 1926 воын, олӧма Ухтаын. Вӧлӧма «Изваильскӧй» совхоз да «Мемориаллысь» Ухта-Печораса юкӧн котыртысьяс лыдын. Матӧ 10 во веськӧдлӧма сэтчӧс вӧр-ва видзан обществоӧн. Буретш Алексей Терентьевлӧн водзмӧстчӧмӧн Ухта бердын абу кыпӧдӧмаӧсь цемент да сёй вӧчан заводъяс. Нёль во сайын, 2016 воын, Ухтаын Оплеснин уличаса 2-ӧд керка стенӧ ӧшӧдісны Алексей Иосифовичӧс казьтылана пӧв.
Сӧмын кӧ татшӧмторйӧн выль юралысьыд пондас ноксьыны, сылы и вит вося кадколастыс оз тырмы. Ӧд Комиын некодарсянь «лӧсявтӧм» нимыд, ой-ой, уна сюрас! Шуам, Энгельс нима улича позьӧ вежны Дмитрий Батиев вылӧ, Клара Цеткин мед лоас Александра Батманова, Кутузов – Афанасий Маегов, Зоя Космодемьянская – Галина Дубровская, Водопьянов – Пётр Истомин да с.в.
А мый?! Республикаын больничаяс кыпӧдӧм, школаяс дзоньталӧм, йӧзӧс уджӧн могмӧдӧм – тайӧ ӧд сьӧкыд да уна вын пуктана, но абу дзик пыр тыдалана мырсьӧм. А сьӧмыс тайӧс вӧчӧм да улича ним вежӧм вылӧ пӧшти ӧтмында колӧ…
Кадыс эм на да, видзӧдлам, кандидатпуяссьыд коді мыйӧн петкӧдчас…
Анжелика Елфимова.