Урал-Из бердын вӧрса кӧрыс ӧтарӧ чинӧ и чинӧ: кӧдзыд да джуджыд лымъя тӧлыс ноябрсянь май помӧдз кыссьӧ, гӧрасянь исковтысь лым улын быдса стадаӧн лямалӧны-кулӧны, бӧрсяньыс сан-кӧинъяс вӧтлысьӧны. Та вӧсна 2008 восянь нин вӧрса кӧръяссӧ пасйӧма Комилӧн Гӧрд небӧгӧ.
2019 вося арын вӧрзьӧдлытӧм вӧр-валӧн ставмирса фонд (WWF) Mondi Groop компаниякӧд босьтчис збыльмӧдны Комиын да Камчаткаын вӧрса кӧр юрлыдсӧ содтӧм кузя уджтас.
Проектыслӧн пасӧн лоис Сыктывкарса вӧр комбинатын лэдзан «Снегурочка» кабалалӧн брендыс.
2020 вося гожӧмӧ уджтаслӧн «чужӧмӧн» лоис сьылысь Пелагея — та йылысь Россияса WWF юӧртіс Instagram-ын.
«Югыд ва» национальнӧй паркын да Печора-Ылыдзса заповедникын дас пемӧслы, тшӧтш и кабала серти Снегурочкаӧн нимтӧм энь кӧрлы, голяас пысалісны GPS-а дом, медым туявны, кыті ветлӧдлӧны пемӧсъясыс тулысын да арын, тӧлын да гожӧмын.
Спутник пыр воӧм юӧрыс отсалас ӧдйӧджык корсьны-аддзыны пемӧсъяссӧ да артыштны налысь лыдсӧ.