Казьтыштісны землякъясӧс

Дасысь унджык во нин Россияса президент бердын Коми представительство, Москваын «Коми землячество», «Парма» да Русь Печорская» котыръяс «Паметьлӧн вежон» дырйи казьтылӧны миян республикаысь петлӧм нималана войтырӧс, кодъяс овлісны странаса юркарын.

Июль 10 лунӧ миян землякъяс пуктісны дзоридзьяс Кремль стен бокӧ Вячеслав Александрович Малышевӧс дзебанінӧ. СССР-са Министръяслӧн Сӧветысь Председательӧс вежысь йылысь кыв висьталісны Москваын Коми представительствоӧн веськӧдлысьлысь удж вӧчысь Сергей Мамонов, Федерация Сӧветӧ пырысь Валерий Марков, «Коми землячествоӧн» юрнуӧдысь Людмила Великорода. Найӧ пасйисны, мый Вячеслав Александрович Малышевлӧн олӧмын петкӧдчӧ ставнас страналӧн историяыс, и колӧ, мед сы йылысь тӧдісны быдмысь войтыр. Александр Твардовский нима 293-ӧд номера школаын велӧдчысь Арина Габова лыддис «И над холмами величаво», а 1539-ӧд номера велӧдчанінысь Амир Ташматов – «Пусть небо будет голубым» кывбур.

Краснӧй площадьсянь миян землякъяс мӧдӧдчисны Новодевичӧй шойна вылӧ. Комиын быдӧн кывліс экономика наукаса доктор, профессор Владимир Николаевич Старовскийлысь нимсӧ. Таво сылӧн чужӧмсянь тырис 115, а кулӧмсяньыс – 45 во. Дзоридзьяссӧ пуктісны Владимир Николаевичлӧн, сылӧн Анисия Ивановна гӧтырыслӧн да Олег Владимирович пиыслӧн  гуяс вылӧ.

Анисия Ивановна (нывдырйиыс Тентюкова) – Коми АССР-са да РСФСР-са заслуженнӧй велӧдысь, Ленин ордена кавалер. Сійӧс бӧрйылӧмаӧсь Сыктывкарса сӧветӧ депутатӧн.

Олег Владимирович Старовский – химия наукаса кандидат, пыр водзмӧстчыліс «Парма» национально-культурнӧй котырын.

Новодевичӧй шойнаын жӧ дзебӧма Дмитрий Георгиевич Дубровскийӧс (Сивковӧс). Чужлӧма сійӧ Сыктывдін районса Граддорын. 1914 воын помалӧма церковно-приходскӧй школа, сэсся Усть-Сысольскын нянь пӧжаланінын уджалӧма, батракалӧма. 1921 воӧ доброволечӧн мунӧма Гӧрд армияӧ, вежӧма овсӧ. Айму вӧсна Ыджыд тыш дырйи мездӧма Волхов, Орёл, Чернигов, Брест, Рига, Варшава, Берлин каръяс. 1945 восянь генерал Дубровский веськӧдлӧма Саксонияса военнӧй администрациялӧн управлениеӧн. 1950 воӧ бӧр локтӧма СССР-ӧ, зільӧма Белоруссияса военнӧй округысь военнӧй сӧветын.

2006 вося Май 9 лунӧ Выльгорт сиктын восьтӧмаӧсь генерал Дмитрий Георгиевич Дубровскийӧс казьтылан пӧв.

Комиысь петлӧм нӧшта ӧти мортӧс дзебӧма Новодевичӧй шойнаын. Тайӧ – Россияса заслуженнӧй артист Евгений Яковлевич Урбанский.

Новодевичӧй манастырын ӧні уджалӧ Владимир Кузьмич Канев. Сійӧ пӧся вочааліс землякъяссӧ, петкӧдліс стрӧйбаяссӧ да висьталіс, кыдзи дзоньталӧны-реставрируйтӧны манастырсӧ. Уджсӧ кӧсйӧны эштӧдны 2024 воӧ, кор енкӧла котыртӧмсяньыс тырас 500 во. Владимир Кузьмич козьналіс «Коми землячестволы» «От Пасхи до Пасхи» календар, Новодевичӧй манастырса зарниӧн кысян мастерскӧйын вӧчӧмторъяслӧн снимокъяса альбом да енкӧлалӧн история йылысь небӧг.

Людмила Великорода.

Казьтыштісны землякъясӧс

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх