Сыктывкарысь Владимир Телепин ӧти лунӧ ваысь кыскӧма-мездӧма нёль мортӧс.
Июль 9 лунӧ Алёшино весьтын Эжва юын бузӧдчӧмаӧсь вель унаӧн. Шойччӧма сэні и Владимир Телепин. Друг сійӧ казялӧма, кыдзи мужичӧй ар вит-квайта пиыскӧд бузгысьӧмаӧсь Эжваӧ. Пиыс сывйыштӧма батьсӧ сьылі гӧгӧрыс да, кывтӧмаӧсь. А сэсся заводитӧмаӧсь пӧдны. Батьыслӧн кокыс пыдӧсӧдзыс абу судзӧма, а пиыс сылӧн мыш вылас вӧлӧма. Владимир уськӧдчӧма ваӧ да кыскӧма найӧс береглань.
Минут комын мысти сэні жӧ тӧкӧтьӧ бара абу лоӧма неминуча. Кык нывкаӧс, видзӧдӧмпырысь, 6 да 10 арӧсаӧс, заводитӧма кылӧдны визулыс. Владимир Телепин бара уськӧдчӧма отсӧг вылӧ. Нывкаяслӧн эбӧсыс нин бырӧма, кор мужичӧй кыскӧма найӧс джумйысь.
Кыдзи висьталӧны шойччысьяс, Эжваыс сэні абу ёна джуджыд, та вӧсна йӧзыс келӧны шӧрӧдзыс. А сэні нин зэв визув да ӧдйӧ кылӧдӧ джуджыдінас.
Ӧтуввезйын йӧзыс аттьӧалӧны Владимир Телепинӧс нёль мортӧс пӧдӧмысь мездӧмысь. Ыдждӧдлӧны сійӧс геройӧн да анделӧн. Корӧны мужичӧйӧс пасйыны медальӧн.