Республикаса юралысьлысь удж вӧчысь Владимир Уйбакӧд аддзысьлігӧн ветеран котыръ-ясын водзмӧстчысьяс кыпӧдлісны кокньӧдъяс да олӧма йӧзлы социальнӧй отсӧг сетӧм, санаторийясын найӧс бурдӧдӧм да гырысь арлыдаӧс видзан керкаяс стрӧитӧм йылысь сёрни.
Войнаса, уджвывса, Вооружённӧй вынъясса да право доръян тэчасъясса ветеранъяслӧн (пенсионеръяслӧн) Коми Республикаса сӧветӧн веськӧдлысь Людмила Жукова висьталіс, мый олӧма йӧзлӧн керкаясӧ ӧні витсё мортӧдз тӧрӧдӧны. Тайӧ пӧ вывті уна. Медым гырысь арлыдаяслы лӧсьыда сэні овсис, ичӧтджык керкаяс пӧ колӧ кыпӧдны.
Владимир Уйба гӧгӧрвоис Людмила Жуковалысь майшасьӧмсӧ да вӧзйис матысса во-мӧдӧн Сыктывкарын лэптыны ветеранъяслы торъя патераяса керка. Быдӧнлӧн пӧ аслас оланін лоас, но и керкаысь петавтӧг позяс ыджыд жырйын лекция кывзыны, кино видзӧдны, «кают-компанияын» рытпукны.
–Ветеранъяс виччысьӧны, мый ми кутам тӧждысьны на вӧсна, отсавны налы, и миянлы колӧ сетны отсӧгсӧ, – висьталіс Владимир Уйба. – Сэк жӧ оз позь дӧнзьӧдны, дӧзмӧдны найӧс.
Татшӧм керкаяссӧ, Владимир Уйбалӧн кывъяс серти, колӧ кыпӧдны карын и сиктын, медым ни ӧти ветеран эз кыв асьсӧ ӧтдортӧмӧн. Окота кӧ пӧ, мед и лавкаӧ вермис петавны, гӧститны ветлыны, автобусӧ пуксьывны.
Социальнӧй отсӧг сетӧм йылысь сёрнитігӧн ветеранъяс корисны лӧсьӧдны унджык позянлун бурдӧдчыны санаторийын, праздникъяс кежлӧ вичмӧдны отсӧг. Владимир Уйба вочавидзис, отсавнысӧ пӧ кивывджык сьӧмӧн. Сідзжӧ висьталіс, лунвылын пӧ Комилӧн эмӧсь челядьлы и ветеранъяслы санаторийяс. Но, вӧлӧмкӧ, челядьлӧн бурдӧдчанінъясын шойччӧны страна пасьталаысь ныв-зон, а Комиысь веськавны сэтчӧ оз вермыны. Ме пӧ тшӧкті медводз бурдӧдны ас регионысь челядьӧс. Сідзжӧ пӧ и Комиысь ветеранъяс медвойдӧр мед шойччисны республикалӧн борд улӧ пырысь санаторийясын.
Аддзысьлігӧн Владимир Уйба ошкис ветеранъяслысь ӧткымын водзмӧстчӧм. Торйӧн кӧ, Воркутаын, Интаын да Усинскын лӧсьӧдны Победалысь паркъяс да петкӧдлыны сэні война кадся техника.
–Зэв тӧдчана висьтавны челядьлы да внукъяслы, кутшӧм донӧн ми шедӧдім Вермӧмсӧ, – пасйис Владимир Уйба.