Июль 9 лунӧ Владимир Уйба уджмогъяснас ветліс Емдін районӧ. Зӧвсьӧртын да Мадмасын сійӧ аддзысьліс сэтчӧс олысьяскӧд.
Мадмасын школаыс да детсадйыс меститчӧны киссян выйын стрӧйбаясын да, сиктсӧветса депутат Наталия Нейман юаліс республикаса веськӧдлысьлысь, кор пӧ кыпӧдасны выль школа-садсӧ. Владимир Уйба вочавидзис, мый «Выль школа» уджтас серти сёрнитчӧмаӧсь Россияса Сбербанккӧд стрӧитны 14 велӧдчанін. Мадмассаыс пӧ тшӧтш лӧсялӧ тайӧ уджтасыслы.
Медикъясысь сиктас эм сӧмын фельдшер, да врач дорӧ йӧзыслы лоӧ ветлыны Зӧвсьӧртӧдз либӧ Айкатылаӧдз. Республикаса юралысьлысь удж вӧчысь висьталіс, Мадмасын пӧ во-мӧд мысти кыпӧдасны ФАП.
* * *
Микуньын Владимир Уйба пыраліс карса культура керкаӧ. 2018 воӧ капитальнӧя дзоньталӧмаӧсь 70 вося стрӧйбасӧ, а мӧйму вӧчӧмаӧсь ортсыса удж, пелькӧдӧмаӧсь йӧрсӧ, ньӧбӧмаӧсь выль оборудование.
Культура керкаса 21 творческӧй котырӧ волӧ 323 морт, сы лыдысь 160-ыс – челядь.
Бассейнсӧ Микуньын восьтісны 2017 воӧ. Владимир Уйбалы висьталісны, мый варччаніныскӧд орччӧн кыпӧдасны ворсан зал, но та вылӧ пӧ колӧ содтӧд сьӧм торйӧдны. Проектыс дась нин, сійӧс кӧсйӧны пыртны 2021 вося республикаса инвестицияа программаӧ.
* * *
Емдін район водзӧ сӧвмӧдӧм йылысь сёрни пансьыліс Владимир Уйбалӧн общественникъяскӧд аддзысьлігӧн.
Зӧвсьӧртысь Татьяна Батиева вӧзйис вӧчны посёлокас лызьӧн котралан база. Владимир Уйба ошкис вӧзйӧмсӧ, и республикалӧн 100 вося юбилей кежлӧ Зӧвсьӧртын лоас югзьӧдӧм трасса.
Районса ветеранъяслӧн котырӧн юрнуӧдысь Татьяна Павлова юаліс регионса веськӧдлысьлысь, кор пӧ райбольничаӧ ньӧбасны маммограф. Владимир Уйба висьталіс, мый сійӧ августнас нин воас райбольничаӧ.
Ичӧт да шӧр бизнеслы отсалӧм йылысь сёрнитігӧн регионӧн веськӧдлысь пасйис, мый Комиын лӧсьӧдӧны сідз шусяна цифрӧвӧй платформа. Сійӧ сетас позянлун унджык предпринимательлы уджйӧзавны банкысь сьӧм, а оз кӧ сетны, власьт тэчасын зільысьяс нюжмасьтӧг отсаласны бизнес кутысьяслы.
Зӧвсьӧртысь 3-ӧд номера школаӧн веськӧдлысь Светлана Лопушкова аттьӧаліс Владимир Уйбаӧс да йӧзӧс велӧдан министерство велӧдчанінъясӧ автобусъяс ньӧбӧм вылӧ сьӧм вичмӧдӧмысь. Сентябрь 1 лунӧдз республикаӧ воас 52 автобус, и на лыдысь ӧтиӧс ыстасны Зӧвсьӧртӧ.
Аддзысьлӧм дырйи сёрнитісны тшӧтш райбольничаӧ тэрыб отсӧг сетан машинаяс, От гӧраса сиктъясӧ вуджӧдчан паром ньӧбӧм, Зӧвсьӧртын стадион да Кӧжмудорӧдз туй дзоньталӧм йылысь.
* * *
Емдін районысь овмӧдчӧминъясса администрацияясӧн веськӧдлысьяскӧд да депутатъяскӧд аддзысьлігӧн Владимир Уйба юӧртіс, мый сикт-посёлокъяс совмӧдӧм могысь вичмӧдасны содтӧд отсӧг – 52 миллионысь унджык шайт.
–Каръясын да районса юрсиктъясын «Комфортная городская среда» федеральнӧй уджтас серти пелькӧдӧны-мичмӧдӧны йӧзаинъяссӧ. А ми, сиктса овмӧдчӧминъяс, ог вермӧй веськавны тайӧ уджтасас, – пасйис аддзысьлігас Гамысь Валентина Васюченко. – А асланым сьӧмыс тырмӧ сӧмын улич весавны да югзьӧдны. Медым и сиктын йӧзыслы овсис бура, колӧ лӧсьӧдны «Комфортная сельская среда» уджтас.
Владимир Уйбалӧн кывъяс серти, республикаса правительство оз ӧтдортчы тайӧ уджсьыс, и таво нин сиктсалы вичмӧдасны содтӧд сьӧм.
–Ветымын кык миллионсьыс Емдін районлы лоӧ торйӧдӧма 2 миллион 569,5 сюрс шайт. Матысса кадӧ нин вынсьӧдам регионса правительстволысь шуӧм, и сьӧмыс воас районъясӧ, – висьталіс республикаса юралысьлысь удж вӧчысь.