Республикаса войтыр тшӧкыда шыасьлӧны Владимир Уйба дорӧ сикт-посёлокъяс биаруӧн могмӧдӧм йылысь юалӧмӧн.
—Биару трубасӧ сиктӧдз вайӧдны этша на, колӧ сійӧс быд керка дорӧдз нюжӧдны, — висьталіс регионӧн веськӧдлысь. — Кӧрткерӧс районын тайӧ уджсӧ «Газпром» кӧсйӧ эштӧдны 2022 воӧдз. Ме тшӧкті нин Кӧрткерӧсса да мукӧд районса, кӧні лӧсьӧдчӧны нюжӧдны трубаяссӧ, админи- страцияясӧн юрнуӧдысьяслы ас кадӧ дасьтыны овмӧдчӧминъяс газифицируйтӧм кузя проект- сметасӧ.
Республикаса дас муниципалитетын 52 сикт-посёлок могмӧдӧма нин биаруӧн.
—Дерт, республикаын, кӧні перйӧны биару, тайӧ этша на, — пасйис Владимир Уйба. — Таво кельыдлӧз ломтасыс воис Сыктывкарысь Кӧджпомса да Выльгортысь Дав-3-са ас керкаясӧ. Во помӧдз биаруӧн могмӧдам и Сыктывдін районса Часын олысьясӧс. Сідзжӧ ӧні нюжӧдам трубаяссӧ Сыктывкарысь Лесозаводса керкаясӧ.
Та кындзи шуӧма вайӧдны биарусӧ Вылыс Максаковкаса куим микрорайонӧ, Сыктывдінса квайт да Сыктыв районса сизим сикт-посёлокӧ.
—Сьӧкыдлунъяскӧд паныдасьӧм войтырлы вичмӧдам 30 сюрс шайтӧн, медым найӧ вермисны мынтысьны керкаӧдзныс биару трубасӧ вайӧдӧмысь. Судзсьытӧма олысьяслы отсӧгыс ыджыдджык — 50 сюрс шайт, — висьталіс республикаӧн веськӧдлысь. — Сьӧмсӧ корӧм могысь колӧ сӧмын шыӧдчыны йӧзӧс социальнӧя доръян шӧринӧ либӧ матысса МФЦ-ӧ. И сэні отсаласны дасьтыны став колана документсӧ.