Кольӧм вежонӧ Коми Республикаса вужвойтырлӧн шылада-драмаа театрӧн веськӧдлысьяс да Сыктывкарысь главнӧй архитектор бӧрйисны, кытчӧ кыпӧдасны театрлы выль стрӧйба.
Кыдзи висьталіс театрын художествоа веськӧдлысь Светлана Горчакова, стрӧитны колӧ кар шӧрӧ да лӧсялана инӧ. Та вылӧ подуласьӧмӧн и бӧрйӧмаӧсь местасӧ.
—Сыктывкарысь главнӧй архитектор Владимир Рунг майнас на, кор аддзысьлім «гӧгрӧс пызан» сайын, шуис, ин бӧрйӧмыс пӧ — кывкутана удж да ковмас быд боксянь ставсӧ туявны. И со кольӧм вежонӧ ми аддзысьлім, донъялім вӧзйӧминъяссӧ, — висьталіс Светлана Гениевна.
—Миянлы вӧзйисны вит места, — водзӧ висьталіс сійӧ. — Медводдзасӧ ме пыр жӧ кириті, сэтчӧ весиг автобус оз ветлы да. Мӧдыс — Домна Каликова нима да Киров нима уличаяс вомӧнасянінкӧд орччӧн — оз жӧ лӧсяв, сэні местаыс ичӧт. Ӧд театр дорын ковмас лӧсьӧдны сквер да сідз шусяна парковка. Миянлысь спектакльяс видзӧдны волывлӧны весиг Изьвасянь! Ог нин казьтышт кулӧмдінсаясӧс да абъячойсаясӧс. Мӧд кык местаыс, кодӧс вӧзйисны, оз жӧ лӧсявны. Сэні ӧнія сідз шусяна небоскрёбъяс сулалӧны да, театрыд на пӧвстӧ вошас. Витӧд иныс: Октябрь шӧртуй да Оплеснин нима улича вомӧнасянінын, нёльӧд номера ӧтувъя пывсянлы воча. Сійӧс и бӧрйим.
Светлана Горчаковалӧн кывъяс серти, театрлы выль стрӧйба кыпӧдӧм могысь медводдза воськовсӧ вӧчӧма. Ӧні колӧ мӧвпыштны-артыштны, дона-ӧ сувтас эскиза проектыс да коді дасьтас проект-сметаа документъяссӧ.
Екатерина МАКАРОВА.