Удораын аддзысьлӧмъяс

Июнь 22 лунӧ республикаса юралысьлысь удж вӧчысь Владимир Уйба воліс «Лузалес» компаниялӧн Усогорскса терминалӧ.

Удораын компаниялы сьӧкыд вӧлӧма петкӧдны вӧрсӧ, и тайӧ мытшӧдсӧ венӧм могысь Усогорскын стрӧитӧмаӧсь сӧвтчанін да нюжӧдӧмаӧсь сэтчӧдз кӧрт туй. Таво кӧсйӧны заводитны кыпӧдны дзоньтасян цех да куим судтаа торъя стрӧйба, кӧні меститчасны диспетчерскӧйяс, мастеръяслӧн жыръяс, нуръясянін. Сэні жӧ кутасны овны и вахтаӧн уджавны воысьяс.

«Лузалеслӧн» Удораса юкӧнын кызвын уджалысьыс (90 прӧчентысь унджыкыс) — татчӧс олысьяс. 2019 воӧ предприятиеыс мынтӧма районса бюджетӧ 6,5 миллионысь унджык шайт, воддза сертиыс кык пӧв содтӧма и социальнӧй юкӧнын ёртасьӧм йылысь сёрнитчӧм серти сьӧма отсӧгсӧ.

Машинаӧн ветлан туйяс кузя республикаса управлениекӧд да Комиын туйясӧн вӧдитчан компаниякӧд сёрнитчӧмӧн «Лузалес» торйӧдас 8 миллион шайт дзоньтавны Кослан кӧрт туй станцияӧдз туй.

* * *

Владимир Уйба воліс и Усогорскса питомникӧ.

Сійӧс вӧлі котыртӧма 1970 воясӧ. 2008 воӧ 49 во кежлӧ кӧртымалӧмаӧсь 52 гектар му, а таво сэні садитӧмаӧсь 15 миллион быдтас.

Питомникыс быд во иналӧ керасъясын садитӧм вылӧ 4 миллион пожӧм да коз. Понӧльяссӧ ньӧбӧны оз сӧмын Комиысь, но и Карелияысь, Кардор да Киров обласьтъясысь предприятиеяс.

* * *

Удора районса шӧр больничаӧ волігӧн Владимир Уйба тӧдмасис медицина отсӧг сетанногӧн.

Таво бурдӧдчанінса кык юкӧнын вӧчӧмаӧсь дзоньтасян удж, автопаркас содтӧд воӧма кык машина, больничаыс ас тшӧт весьтас ньӧбӧма вир туялан аппарат.

Главврач Александр Полюховичлӧн кывъяс серти, бурдӧдчанінын оз тырмы специалистыс (врачыс колана мындасьыс сӧмын 55 прӧчент, шӧр тшупӧда медработникыс — 70%). Колӧ пӧ дзоньтавны и терапия юкӧн да сёян дасьтанін.

Сёрӧнджык Удораса олысьяскӧд аддзысьлігӧн Владимир Уйба юӧртіс, мый дасьтӧны Комиын бурдӧдчанінъяс выльмӧдан республикаса уджтас. Та дырйи тӧд вылын кутӧны районъяслысь аслыспӧлӧслунсӧ, тшӧтш и сійӧс, мый олысьыс сэні этша.

Удораын аддзысьлӧмъяс

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх