Студенталігӧн на Коми небӧг лэдзанінын петіс менам медводдза небӧгӧй. Надежда Быковская мырдӧн, помнита, ыстӧ вӧлі менӧ сёрнитны издательствонас веськӧдлысь Пётр Столповскийкӧд книга лэдзӧм йылысь. А ме весиг коридорас паныдасигӧн сы вылӧ синмӧс эг лысьтлы лэптыны – сэтшӧма вежавидзи «Про Кешу, рядового князя» авторысь. Коркӧ смелмӧдчи да кежалі жӧ издательствоад (редакциякӧд ӧти судтаын вӧлі). Бӧрыннас Пётр Митрофанович висьтавліс: пырис пӧ ме дорӧ ичӧтик, мыйлакӧ носки кежсьыс нывка, вайис кывбуръяса рукопись. Видзӧдлім пӧ да шуим, мый ӧчередтӧг йӧзӧдам…
Рукописьыд эськӧ, шуам, менам дась вӧлі. А ӧд колӧ на кывбуръяссӧ лӧсьыда сьӧрсьӧн-бӧрсьӧн тэчны! А кутшӧм ладӧн, код тӧдас. Лэччи ме сэк мӧд судтаас – гижысь котырӧ, литконсультант Владимир Тимин дорӧ. Лӧсьӧд, шуа, Владимир Васильевич, кыдз колӧ, ме ог куж. Гоз-мӧд лун мысти сэсся кежалі да, джодж пасьталаыс менсьым листъястӧ разӧдӧма да нускӧ. Но пӧ и удж сетыштін! Сійӧ жӧ и небӧгын водзкывсӧ гижис. Сэксянь Владимир Васильевич лоис меным литератураын вежайӧн. Вирӧй менам сыкӧд, шонъянӧйкӧд, лӧсяліс.
Кыдзи «том» кывбуралысь, удитлі гижысьяслӧн сӧмын кык семинар вылӧ ветлыны: Кулӧмдінӧ да Улыс Тагилӧ (сэні вӧлі Нина Обрезковакӧд). А сэсся гижысь котырад пыртісны да, «верстьӧӧн» нин куті шусьыны, и татшӧм велӧдчӧмыслы воис пом. Ме и ӧні на, веськыда кӧ шуны, ог куж кывбуртӧ гижны, пыр на велӧдча, и нэм помӧдз кута велӧдчыны.
«Коми му» газет бӧрын веськалі «Чушканзі» журналӧ. Быдӧнлы вӧлі ошйыся, со, мися, сӧран, да сӧрӧм-сьыд нӧшта на и удждон вештӧны!
А сэсся шӧр редакторным вежсис да, эгӧ кутӧй лӧсявны. Сійӧ меным веськыда и шуис: мун нин пӧ кытчӧкӧ мӧдлаӧ, меным тэ пыдди колӧ мӧд мортӧс босьтны!
И сэк буретш Владимир Васильевич петіс литконсультантсьыс пенсия вылӧ. Ме и вӧзйыси гижысь котырад!
Сійӧ кадас менам вӧлі куим ыджыд кӧсйӧм: лэдзны небӧг, лэбзьывны вертолётӧн да уджавны гижысь котырын. Сэк кежлӧ небӧгтӧ лэдзи нин. Выль местаад удждонын матӧ куим пӧв вошті, но ставыс вӧлі веськодь! А выльлаын зілигӧн сэсся и вертолётад пуксьывлі!
Медводдза небӧг бӧрад Эстонияын менам мӧд петіс. Сэтчӧ ветлігӧн гоз-мӧдӧс вайи сьӧрысь. Коді удитіс корны, сылы козьналі. Аслам, буракӧ, гортын ӧти кӧнкӧ эм на…
2010 воын йӧзӧді нӧшта ичӧтик кывбур чукӧр. Ачым ичӧтик да, небӧгъясӧй ас кодьӧсь жӧ. Да и кывбуръясӧй дженьыдӧсь. Коркӧ кутшӧмкӧ аддзысьлӧм вылын юалісны, мыйла пӧ ичӧт кывбуръяс гижан? Ме и вочавидзи: кор классикӧн лоа да творчествоӧс кутасны школаын велӧдны, мед ныв-зон ме вылӧ кузь кывбуръясысь эз сӧткыны! И рифмаӧн гижа, мед бара жӧ велӧднысӧ вӧлі кокни!..
«Еджыдъясыд» петавлӧны жӧ, но гежӧдика. Мукӧд кывбуралысьыс шуӧ, рифмаыд пӧ «йӧртӧ» кывбуртӧ, оз позь некодарӧ кежны. А ме серти, мӧдарӧ, став сӧнтӧ зэлӧдӧ, оз лэдз сэтчӧ ковтӧм кыв-образтӧ пыртны. А рифма гоз корсьӧмыд?! Овлӧ, лунтыр мырсян да войсӧ на он узь! И кор сюрӧ вӧвлытӧм на, лӧсьыдыс! Кывбур гижӧм-чужтӧм йывсьыд, ок, уна верма висьтавны, но тайӧ лоас нин оз автобиография…
Печать керкаын кындзи сэки нӧшта на Сыктывкарса коми культура шӧринын уджалі, и кутшӧмкӧ кад кольӧм мысти бӧр сы пыр жӧ бара на культура олӧмад суныштлі, кӧть эськӧ быдсяма гажсӧ ы-ы-ыліті нин вӧлі кытшлала, горзьӧдлытӧдз лоис да.
Шӧринсяньыд со и бӧр коми журналист кӧлеяад веськалі. «Коми мусяньыд» вои «Чушканзіӧ». Кӧть эськӧ дзик-дзик некор нин эг чайтлы татчӧ бергӧдчынысӧ!
Журналисталӧмыд меным кажитчӧ сійӧн, мый тані эм позянлун и йӧзкӧд тӧдмасьны, и тӧдмӧдны накӧд мукӧдсӧ. Ме зэв ёна радейта юксьыны сійӧн, мыйысь сьӧлӧм-лов вылын долыд. Торйӧн нин бур коми йӧз йывсьыс радейта гижны. И окота сы мында висьтавны, мый газетас мукӧддырйиыс весиг коймӧд пайыс оз тӧр!
Журналад и сэк гажа вӧлі, а ӧні нӧшта на гажаджык! Кулитны оз позь, янӧдны оз позь, эрдӧдны оз позь… Но сы пуд гусьӧн серавны мыйта кӧсъян позьӧ! Со и сералам…
Шмонитны кужа да, тайӧ, кӧнкӧ, и вӧчӧ менӧ ӧнія олӧмас шуда мортӧн. Ӧд видзӧдлыны кӧ, мый керсьӧ гӧгӧрыд, юрсиыд сувтсӧн сувтлӧ, кӧть сэсся дзик пыр китӧ кресталӧмӧн бабышт…
Анжелика Елфимова.