Коронавируслы паныд водзсасигад эг и тӧдлӧй гожӧм воӧмтӧ. Важӧн нин дзоридзаліс льӧм, юяс ышмывлӧм бӧрас кыркӧтшӧ пырисны, вот-вот ва турун мыччысяс. Миян вугралігкості кольӧма нин бӧрӧ медкузь луныс меддженьыд войыскӧд. Ныр улын Россияса том йӧзлӧн гаж.
Уна сьӧкыдлун тавося тулысыс вайис налы, торйӧн нин школаын велӧдчысьяслы да студентъяслы. Зэв унаӧн пӧгибӧ волісны, кор томуловыд сиктса керкаад йӧршитчывлісны эз ӧти, а душ-мӧд, да нӧшта разнӧй классысь. Висьталӧм сертиыс, зэв «гажа» вӧлӧма. И быдӧн гӧгӧрвоӧма, мый дона вӧлӧма велӧдысьыд, кодлысь тӧдӧмлунсӧ бӧръя кадӧ, позьӧ шуны, талявлісны.
А мыйта сьӧкыдлун паныдасис тӧдӧмлунтӧ выль ног босьтігӧн, огӧ нин лыддьӧдлӧй: та йылысь ёна нин гижӧма и кыв гаддясьтӧдз сёрнитӧма. Миян чинаыд рӧзваль тыр, мед и разьӧны тайӧ гӧрӧдъяссӧ.
А ӧні, сё майбыр, гожся каникул. Пӧтмӧн гожйӧдчасны да шпольӧдчасны шоналӧм юас том йӧз, номсасясны вӧрса чӧскыд кӧра вотӧснас и вугыр шатинӧн кыйӧм черинас. Дерт, поводдяыд кӧ оз кут ыръянитны, войвылад ӧд сійӧ руа морт кодь, мый на дзумгас сылы юрас.
Но сиктса челядьлы весь шлёчвидзны бать-мам оз лэдзны, коді мый вермӧ – бергӧдӧ горт-гӧгӧрса удж, а сійӧ, кыдз тӧдам, лым усьтӧдз помасьлытӧм.
Инара Бабаханова таво помаліс дасӧд класс. Зэв вежавидзысь, сибыд, кывкутысь, мывкыда да бура велӧдчысь нывка. Радейтӧ фотографируйтны, лыддьысьны, котраліс йӧктан кружокӧ. Кыдзи и бать-мамыс, велӧдысьяс Алескер Мурадович да Алёна Михайловна, кодъяс ӧні уна помка вӧсна кутӧны грездас ичӧтик вузасянін, вылӧ пуктӧ коми культура да обычайяс.
Зэв сюся пырӧдчӧ школаса олӧмӧ. Велӧдчӧм морт моз нин нуӧдіс урокъяс школаын челядьлӧн асвеськӧдлан лунӧ. Зэв бур строевик, пырӧ школаса знамя новлан котырӧ.
А 2018-2019 воясӧ школаын нуӧдан военно-патриотическӧй уджысь да стройӧн ветлан да сьылан смотр дырйи командиралӧмысь нывлы вичмис армиялы 100 во тырӧмкӧд йитӧдын кӧртысь ас киӧн дасьтӧм зэв мича орден.
Асьсӧ водзӧ олӧмас Инара аддзӧ вылыс тӧдӧмлун босьтӧм бӧрын йӧз пӧвстын бергалӧм-уджалӧмын.
Владимир Шомысов.