Кольӧм вежонӧ киритӧмаӧсь «Технопарк» компаниякӧд Шиес станцияын шыблас чукӧртанін вӧчӧм йылысь сёрнитчӧм. Татшӧм ногӧн пуктӧма войвылын олысьясӧс шызьӧдан уджтаслы пом.
Сідзжӧ полиция эштӧдӧма Шиес дорысь вӧр бырӧдӧмкӧд йитчӧм туясьӧмсӧ. Оланпас торкалӧмӧн пӧрӧдчысьяслы, дерт жӧ, ковмас мынтыны штрап.
Кор Владимир Уйба босьтчис республикаса юралысьлӧн уджӧ, пыр жӧ кулитіс шыблас чукӧртан полигон стрӧитӧмсӧ. И сылӧн видзӧдласыс эз вежсьы.
–Оз позь вӧчны нинӧм, мый ваяс вӧр-валы да йӧзлӧн дзоньвидзалунлы лёксӧ, – пасйис Владимир Уйба. – Нимкодь, мый «Шиес» уджтас серти «Технопарккӧд» сёрнитчӧмсӧ киритӧма.
Республикаса юралысьлысь удж вӧчысьлӧн кывъяс серти, шыблас бырӧдігӧн медвойдӧр колӧ кутны тӧд вылын, медым лёкыс таысь эз ло ни мортлы, ни вӧр-валы. Войвылын кодь вӧрзьӧдлытӧм вӧрыс да сӧстӧм ваыс пӧ мир пасьталаыс сэсся абу. И ми пӧ ог лэдзӧй вӧчны тані полигонсӧ. Владимир Уйба вӧзйӧ сӧвмӧдны республикаын экотуризм.
–Миян вӧр-ва паркъясӧ этшаӧн на волывлӧны шойччынысӧ, – висьталіс республикаса юралысьлысь удж вӧчысь. – Войвывса вӧрзьӧдлытӧм вӧр-васӧ видзӧ ЮНЕСКО. Но видзӧмыс оз инды, мый став туйсӧ колӧ потшны да некод мед эз веськав мичаинъясас. Мӧдарӧ, колӧ унджык туристӧс ышӧдны волывлыны.
А медым туристъясыс волывлісны татчӧ, национальнӧй паркъясын колӧ лӧсьӧдны бур шойччанінъяс, узьланінъяс.
–Ми аддзам нин республикаын экотуризм сӧвмӧдан нырвизьяссӧ. Но та могысь колӧ и федеральнӧй сьӧм, и ме кыпӧда та йылысь сёрни Россияса правительстволӧн чукӧртчылігӧн, – пасйис Владимир Уйба.