Коми Республикаын виччысьтӧм лоӧмторъясысь да пӧжарысь видзчысьӧм кузя комиссиялӧн чукӧртчылӧм дырйи сёрниыс вӧлі таво тулыснас ытва улӧ веськалӧм сикт-грездын олысьяслы сьӧма отсӧг вичмӧдӧм йылысь.
Казьтыштам, сідз шусяна ЧС режим вӧлі йӧзӧдӧма Луздор,Кулӧмдін, Удора, Чилимдін районъясын, а сідзжӧ Усинскын да Ухтаын. Тайӧ муниципалитетъяссьыс администрацияяслы сетӧма позянлун корны ускӧттьӧӧ веськалӧм йӧзлы отсӧг сетӧм могысь сьӧмсӧ регионса правительстволӧн резерв фондысь.
Таысь ӧтдор, Россияса правительствоын шуӧма видлавны, уна-ӧ сьӧм вичмӧдны Коми Республикалы автомашинаӧн ветлан туйяс дзоньталӧм вылӧ. Кыдз тыдовтчис, ыджыд ваыс ойдӧдліс-жугліс республикалы тӧдчана да ар-районкостса 19 километр да сикт-посёлокъясын 36 километр кузьта туйяс, а сідзжӧ сизим пос да ва лэдзан труба.
Россияса президент Владимир Путин сетіс такӧд йитӧдын ассьыс индӧдсӧ тавося май 26 лунӧ РФ-са регионъясын ытваысь да пӧжаръясысь ускӧттьӧ бырӧдӧм кузя сӧвещание вылын кывкӧртӧд вӧчӧм бӧрын.
Содтӧд пасъям, водзтіджык государствоӧн юрнуӧдысь дорӧ Коми Республикалы отсӧг вичмӧдӧм йылысь корӧмӧн шыӧдчис регионса веськӧдлысьлысь удж вӧчысь Владимир Уйба. Сылӧн кывъяс серти, йӧзлы отсӧгсӧ колӧ сетны кыдз позьӧ ӧдйӧджык.