Койгорт районса Койдінысь нывбаба воис «Что? Где? Когда?» ворсӧмын миллион джын шайт.
Кольӧм вӧскресенньӧӧ, июнь 14 лунӧ, «Что? Где? Когда?» гожся ворсӧмлӧн финалын петкӧдчис Борис Белозёровлӧн команда. Налы уси телевизор видзӧдысьяссянь, стӧчджыка кӧ, Койдінысь Вера Никифоровасянь, кыдз тыдовтчис, вель сьӧкыд юалӧм.
Телестудияӧ петкӧдісны сьӧд ящик, да передача нуӧдысьыс шыӧдчис ворсысьяс дорӧ: «Тол-кӧвӧй словаръясын оз ёна торйӧдны «одиночество» да «уединение» кывъяслысь вежӧртассӧ. А журналист Юрий Рост аддзӧма торъялӧмсӧ да гӧгӧрвоӧдӧма сы отсӧгӧн, мый дзебӧма тайӧ сьӧд кудъяс. Мый сэні?»
Командалы сетісны минут мӧвпавны, но знатокъяс эз вермыны вочавидзнысӧ да корисны нӧшта кад. Но стӧч вочакывсӧ сідз эз и аддзыны.
Ким Галачян пасйис, вермас лоны пӧ, «уединение» – тайӧ кор ачыд бӧръян татшӧм олӧмсӧ, а ӧткалуныс сідз артмӧ. Но сэсся ворсысьяс кежисны тайӧ туйвизьсьыс да, водзӧ эз видлавны.
Командаса капитан Борис Белозёров сетіс кыв вочавидзны Георгий Арабулилы, коді шуис, мый сьӧд ящикас карті колода. Сылӧн кывъяс серти, мортыд пӧ вермӧ, кор ӧтка, ворсны пасьянсысь либӧ картіасьны.
Но сьӧд кудйын вӧлӧма ключ. И Вера Никифоровалы вермӧмсьыс вичмис 90 сюрс шайт. Сідзжӧ сійӧс шуисны медбур ворсысьӧн, таысь козьналісны хрусталь сюзь да 500 сюрс шайт.
–Вера Александровна, тіянлы нимкодь?
–Ме войбыд эг узь. Тайӧ ӧд тшӧтш стресс, кӧть и бур лоӧмтор. Меным везитіс. Командаас ворсысьясыс сюсьӧсь. Но мыйлакӧ найӧ мунісны мӧд туйӧд: думайтісны, мый ящикас гаджетъяс, карті. Дивӧ и сійӧ, мый Андрей Козлов, Александр Друзь, Максим Поташов эз жӧ тӧдны. Кӧть эськӧ залас вӧлі татшӧм сёрниыс, но мыйлакӧ эз пысасьны сэтчӧ. Чайта, командаыс кӧ шыӧдчис отсӧгла, гашкӧ, и знатокъясыд вочавидзисны стӧча.
–Ті медводдзаысь ворсанныд?
–Ыстывлі нин юалӧмъяссӧ. Но оз пыр бӧрйыны. Мукӧддырйиыс во куим-нёль оз босьтны. А тайӧ юалӧмсӧ ме ысті кольӧм во.
Ас йывсьыс Вера Александровна висьталіс дженьыда. Уджавлӧма право доръян тэчасын. Ӧні пенсия вылын. Сьӧлӧмсянь пӧ шойчча.
–Лыддя радейтана гижысьяслысь небӧгъяс, видзӧда радейтана передачаяс. Град йӧрын нокся, быдта оз да дзоридз.
–И кытчӧ видзанныд сьӧма козинтӧ? – бӧръявыв юалі аньлысь.
–Абу на зептын да, та йылысь ог на и думайт…
Екатерина МАКАРОВА.
Койгорт р.