Эмӧсь местаяс, кытчӧ окота волыны. И ачыд весиг он тӧд, мыйӧн найӧ кыскӧны. Гашкӧ, сыӧн, мый йӧзыс на йылысь бурторсӧ уна висьтавлӧны, райӧ пӧ быттьӧ веськавлан. А ӧд сэтшӧм окота му вывсьыс райтӧ аддзывны.
Ӧти татшӧм местаӧн лоӧ Лымва. Лымва – тайӧ и Ньывсерӧ усьысь ю, и грезд, кӧні некод нин оз ов. Коді кӧть ӧтчыдысь воліс сэтчӧ, нэм чӧжыс вежӧрас кутас видзны сійӧс. А коді эз волы – гусьӧникӧн вежавны да пестыны мӧвп, мый быть ветлас.
Дыр жӧ пестім татшӧм мӧвпсӧ и ми. Пестім, пестім да, июнь заводитчигӧн и мӧдӧдчим. Колӧ эськӧ аслым гижны ветлӧм йывсьыс, но юрын сы мында дум бергалӧ, кыдзиджык гижны, да ни ӧтиӧс бӧжӧдыс кутны ог вермы. Сідзкӧ, мед Марина Макарова висьталас.
Эм-ӧ Лымваыс?
Лымваӧ походным заводитчис Вероникалӧн юалӧмсянь: «А мый сійӧ Лымваыс? И эм-ӧ сійӧ?..»
Одыб сиктсянь медводз машинаӧн мунім кызь вит кымын километр. Сэсся нопъясим да мӧдӧдчим подӧн.
Дас километр восьлалім да туй вожаланінӧдз воим.
Шуим шуйгавылас мунны. И регыд ордымыс воши. Но эг бергӧд-чӧй, вӧрӧдыс веськыдалім.
Веськыдалӧм пыдди жӧ кытшлалӧм артмис, и Лымваас сӧмын час кык мысти петім. А веськыдвылас кӧ кежим, тӧдӧмысь, час джынйӧн эськӧ и воим.
Грездас дас кымын важиник керка сӧмын. Но на бӧрся видзӧдӧны, сідзкӧ, волывлӧны на лымвасаяс бать-пӧльыслӧн чужанінӧ.
Поводдяыс мича. Ӧдйӧ пестім бипур, сувтӧдім палаткаяс, сёйыштім-нуръясьыштім. Сэсся вель дыр пукалім, нимкодясим-любуйтчим вӧр-ванас. Нинӧм йылысь мӧвпавны весиг эз кӧсйыссьы. Пукалан да шойччан сӧмын. Мый сэсся и колӧ – та вӧсна ӧд и локтім татчӧ.
Войнас ыркнитіс да, некод дыр эз узь, бипур дорын унджык кадсӧ коллялім.
Аскинас окотитім челядьӧс ворсӧдыштны. Кабалаторъясӧ гижалім Лымвалысь тӧдчанаинъяс, а том войтырыслы тшӧктім корсявны найӧс. Грездыс мылькъяинын сулалӧ да, лӧсьӧдім котралан маршрутсӧ сідзи, медым тшӧкыдджыка ковмыліс чой йылӧдз кайлыны да горув лэччывны. Котралісны да, эз мудзны весиг.
А сэсся ӧтлаын выльысь кытшовтім Лымвасӧ. Став керка дорас мытыстчылім.
Медылысса дорас весиг футболӧн ворсанін вӧчӧмаӧсь.
Рытнас бара пукалім бипур дорын.
Мӧдысь войколалӧм бӧрын чеччим нёль час асылын. Чукӧртім кӧлуйнымӧс да бӧрсӧ бара на дас километр подӧн восьлалім.
И некод ог жалитӧй, мый ветлім Лымваӧ. Ӧд сэтшӧм мичаинъяс аддзылім!
* * *
Медводдзаысь Лымваӧ ёртъяскӧд ме ветлі кызь куим во сайын. Ошйыси налы, да пыр жӧ синныс ӧзйис, вежыс петны кутіс. Юасьӧны: ёна-ӧ вежсьӧма? Керкаясыс сулалӧны на? Часовняыс эм на?..
Дерт, кадыд ассьыс босьтӧ, вочавидзлі ме, но Лымва петкӧдчис пӧшти сэтшӧмӧн жӧ, кутшӧмӧн ми аддзылім сійӧс кызь куим во сайын.
Унджык керкаас волывлӧны, и бура видзӧны найӧс. И Варвара Семёновна Поповалӧн керкаыс сулалӧ.
Зэв лӧсьыда примитліс миянӧс Семӧ Варӧ, рытывбыд варовитім сыкӧд, и шуліс на, Сыктывкарӧ пӧ эг на лэччывлы.
Отсалім збыльмӧдны кӧсйӧмсӧ, бӧрынджык вайӧдлім юркарӧ. Сьӧлӧмыс бурмӧма вӧлі. И миян бурмыліс тшӧтш. Ӧнӧдз шоныда казьтылам Лымваса аньӧс…
Абу кокни Лымваӧдз воӧдчыны. Чайта да, и бур тайӧ. Ветлысь-мунысьыс озджык тшыкӧд сэтысь вӧр-васӧ. Мед и водзӧ олас сійӧ йӧз вежӧрын мувывса райӧн…
Павел Симпелев.
Кӧрткерӧс р.