Комиысь физкультура да спорт министерство дась челядьлысь дзоньвидзалун бурмӧдан гожся кампания кежлӧ. Томуловлы шойччан лагеръяссӧ таво шуӧма котыртны регионса тайӧ ведомствоыслӧн ӧкмыс спортшколаын. 800 том спортсмен ёнмӧдасны сэні дзоньвидзалунсӧ.
Кыдзи и быд во, Раиса Сметанина нима комплексын лызьӧн котралысьяслы да биатлонистъяслы воссяс «Олимп» спортлагер. Сэні виччысьӧны 219 ныв-зонмӧс.
15 кар-районса спортучреждениеяс котыртасны лунся лагеръяс, кытчӧ кутасны волывлыны 1.500 гӧгӧр томулов.
Республикаса физкультура да спорт министерстволӧн да Комиысь «Енбиа томуловлы академия» шӧринлӧн водзмӧстчӧмӧн таво гожӧмнас лоӧ котыртӧма челядьлы варччӧм, вольнӧя вермасьӧм, баскетбол да мини-футбол кузя нёль смена.
Томуловлы лагер-площадкаяссӧ шуӧма восьтыны, кор республикаын вӧчасны кывкӧртӧд, мый позьӧ нин киритны коронавирусысь видзчысян режимсӧ.
Казьтыштам, Коми Республикаӧн веськӧдлысь Владимир Уйба май 26 лунӧ нуӧдӧма регионса правительстволысь заседание, кӧні сёрнитӧмаӧсь, кыдзи гожся каникул дырйи котыртны челядьлысь шойччӧмсӧ да дзоньвидзалун ёнмӧдӧмсӧ. Республикаса да мукӧд регионса лагеръясӧ путёвкаяссӧ дон босьттӧг сетасны судзсьытӧма олысь семьяясысь да бать-мамлӧн дӧзьӧртӧг кольӧм челядьлы, а сідзжӧ енбиа ныв-зонлы.
Таво гожӧм шуӧма вын сертиыс удж вылӧ инавны 8 сюрс гӧгӧр томуловӧс, 56 сюрс нывка да зонка лагеръясын да площадкаяс вылын шойччасны.
Комиысь челядьӧс виччысьӧны Сьӧд да Азов саридзьясдорса, Россиялӧн шӧр регионъясса, миян республикаса стационарнӧй, лунся, уджалан да шойччан лагеръясын, кӧні зэв стрӧга мӧдасны видзӧдны санитария-гигиена бӧрся да, дерт жӧ, мед томуловӧс некутшӧм ускӧттьӧ эз су.
–Колӧ вӧчны ставсӧ, медым миян челядь и таво гожӧм лючки-бура шойччисны да бурдӧдчисны, – кывкӧрталіс Владимир Уйба.