Гоз-мӧд лун нин гожӧм, но йӧзыс оз кывны сылысь воӧмсӧ. Унаӧн ӧд велалӧмаӧсь шойччыны саридз дорын, кӧть нин дас лун, но коронавирус вӧсна таво ставыс дудӧма. Весиг он вермы стӧча шуны, артмас оз ветлыны саридз дорӧ.
Сочиын июнь 1 лунсянь шуӧма восьтыны 34 здравница, июнь – 20 лунъясӧ – нӧшта 13-ӧс, а июль 1 лунсянь – содтӧд 18-ӧс. Нӧшта 15 санаторийлӧн воссьӧм йылысь юӧртасны сёрӧнджык, – гижӧ «Российская газета».
Роспотребнадзорлӧн корӧм серти, санаторийясӧ шойччысьяссӧ шуӧма вайӧдны учреждениеяслӧн транспортӧн кӧрт туй вокзалсянь либӧ аэропортсянь. Йӧзыслы жӧ, санаторийӧ путёвкаысь кындзи, ковмас поликлиникаысь кык справка, мый сійӧ оз вись коронавирусӧн да татшӧм нёрпалысьяс пӧвстас эз ов.
Татшӧм жӧ корӧмъясыс и Крымса санаторийясын. Тайӧ республикасьыс курорт да туризм министерствоын юӧртӧмаӧсь, мый шойччан сезонсӧ восьтасны вочасӧн. Медводз июнь 15 лунсянь кутасны шойччыны сӧмын тайӧ регионас олысьяс. Ставыс кӧ лоас бур, вочасӧн мӧдасны воавны и мукӧдлаысь.
Талун 40 санаторий дась уджавны Роспотребнадзорлӧн корӧмъяс серти. Туй морт керка да отель кутысьяслы быть жӧ ковмас пыдди пуктыны Роспотребнадзорлысь индӧдъяссӧ. А сэтчӧдз налы колӧ шыӧдчыны правительстволӧн порталӧ. Содтӧд на и торъя комиссия донъялас налысь овмӧссӧ.
–Ми дасьӧсь вӧчны ставсӧ, мый корӧ Роспотребнадзор. Весиг мед маскаа да резина кепыся вӧлі шойччысьыс. Но ӧдвакӧ кодлыкӧ лоӧ любӧ таысь, – висьталӧ Сочиын гостиница кутысь Мария Васильевна (ас вылас уджалысьлӧн корӧм серти ним-овсӧ вежӧма). – Локтӧны ӧд йӧзыс шойччыны, саридз кӧрӧн лолавны, сьӧлӧм бурмытӧдзныс купайтчыны-гожйӧдчыны. А ковмас пукавны обсерваторын маскаӧн 14 лун. Тадзитӧ некод оз лок. Тӧлкыс татшӧм шойччӧмсьыс, сӧмын мудз корсьӧм…
Мария Васильевна чайтӧ, мый колӧ бырӧдны став сідз шусяна ограничениесӧ. Йӧзыс мудзисны нин овны «нёль стенын». Сылӧн кывъяс серти, весиг Сочиын олысьяс ӧні оз вермыны матыстчывны саридз дорӧ, погонаяс вӧтлалӧны да.
Сідзжӧ нывбаба чайтӧ, мый оз быд семья вермы шойччыны санаторийын. Сылӧн кывъяс серти, Россияын унджык олысьыс велалӧмаӧсь шойччыны «дикарӧн». Краснодар крайын да тшӧтш и Крымын олысьяс быд гожӧм ас орданыс вочаалӧны вель уна туристӧс. И гожся сезоныс найӧс вердӧ во гӧгӧр.
–Ме дорӧ волывлӧны дыр кад кежлӧ. Эмӧсь семьяяс, кодъяс гожӧмбыд танӧсь. Кодсюрӧ тӧлысь кежлӧ волӧны. Та дыра шойччӧмыс артмӧ санаторийын дорысь донтӧмджык да бурджык. Ӧд кӧсйӧны кӧ, позьӧ шыӧдчыны здравницаӧ, вештыны, шуам, бурдӧдчӧмысь 10 лунся курс. Оз кӧ лэдзны йӧзыслы бура шойччыны, гортын маскаӧн да резина кепысьӧн пукалӧмысь дзоньвидзалуныд оз ёнмы, – кывкӧрталіс Мария Васильевна.
Екатерина МАКАРОВА.