Ӧтуввезса соцсетьын аслас лист бокын Владимир Уйба висьталіс Изьва районӧ ветлӧм да фермер овмӧсӧн веськӧдлыськӧд аддзысьлӧм йылысь.
Республикаса юралысьлысь удж вӧчысь волӧма Олег Терентьевлӧн овмӧсӧ. Олег Михайлович оз сӧмын видз-му овмӧсын зіль, но и общественнӧй уджын водзмӧстчӧ, сійӧ – «Коми войтыр» ӧтмунӧмлӧн исполкомӧн юрнуӧдысьӧс вежысь. Экономикаын сьӧкыдлунъяс вылӧ видзӧдтӧг «Изьва» овмӧс сӧвмӧдӧ йӧв да яй вӧчӧм, эм асланыс нянь пӧжаланін да кондитерскӧй.
Чай юигмоз республикаса юралысьлысь удж вӧчысь да фермер овмӧсӧн веськӧдлысь сёрнитӧмаӧсь бизнесын мытшӧдъяс йылысь. Воӧмаӧсь ӧти кывйӧ и сыын, мый велӧдчанінъясын колӧ дасьтыны специалистъясӧс, кодъясӧс виччысьӧны предприятиеясын, сетны налы колана бур тӧдӧмлун, медым найӧ аддзисны аслыныс удж. Школа помалысьяс пиысь пӧ ставӧн медым вермисны босьтны профессия да сэсся вӧлі налӧн позянлун вердны ассьыныс семьясӧ. Сӧмын пӧ сэки миян челядь лоасны бать-мамыс кодь жӧ тӧлкаӧсь, зільӧсь да уджачӧсь.
Экономика йылысь сёрнитігӧн пасйисны, мый республикаын зільысь войтыр оз вермыны инавны ассьыныс прӧдукциясӧ. Вывті ыджыд пӧ сідз шусяна конкуренцияыс, да ас регионын вӧчӧмторйыс артмӧ вайӧм сертиыс донаджык. Та вӧсна пӧ колӧ отсавны асланым республикасалы, татчӧс зіль йӧзлы, медым налысь прӧдукциясӧ ньӧбалісны Комиын олысьяс. Сэки пӧ и регионным водзӧ сӧвмас.