Кольӧм вежонӧ Россияса президент Владимир Путин сёрнитіс регионъясӧн веськӧдлысьяскӧд ытва да вӧрын сотчӧмъяс дырйи артмӧм омӧльторъяс бырӧдӧм йылысь.
Кыдзи пасйис сэки Владимир Уйба, Коми Республика пӧ ас вынӧн венӧ ойдӧмысь нелючкияссӧ. Отсӧгсӧ пӧ лоӧ сетӧма и ытва улӧ веськавлӧм йӧзлы.
–Ми кытшовтім ойдӧм кар-районъясті. Сэні уджалӧны спасательяслӧн котыръяс, и нелючкияссӧ бырӧдны вынным тырмымӧн, – висьталіс сійӧ.
Но век жӧ ставсӧ ас вынӧн вӧчны он вермы. Экономикаын сьӧкыдлунъяс, мусир вылӧ дон чинӧм да эпидемия паськалӧм вӧсна республикаса бюджетын оз тырмы сьӧмыс, медым дзоньтавны ытваӧн жугӧдӧм туйяс. Водзтіджык жӧ Владимир Уйба пасйыліс, мый туй стрӧитӧм-дзоньталӧмыс лоӧ сылӧн уджын тӧдчана могӧн.
–Владимир Владимирович, таво ытваыс Комиын збыльысь ыджыд, – шыӧдчис сійӧ Россияса президент дорӧ. – Йӧзлы отсӧгсӧ асьным вермам сетны, но туйяссӧ, 70 кымын километр, ваыс кырӧдӧма. Дзоньталӧм вылас 200 миллион гӧгӧр шайт ковмас…
Владимир Путин тшӧктіс Россияса транспорт министерствоӧн веськӧдлысь Евгений Дитрихлы отсавны Коми Республикалы.
–Кытысь ваыс муніс, сэні арталӧны нин воштӧмъяссӧ. И ми вӧчам став позянасӧ, медым корсьны дзоньталӧм вылас сьӧмсӧ, – висьталіс министр странаӧн весьӧдлысьлы.
Дерт, та мында сьӧмыс оз тырмы, медым кырӧдӧм туйяссӧ автострадаясӧн вӧчны. Но республикаӧн веськӧдлысьяс кӧ кужасны сёрнитчыны Москвакӧд, Комиын туйяс стрӧитны-дзоньтавны сьӧмсӧ бюджетысь вичмӧдасны.