Мӧвпышті пасйыштны ассьым олан туйвизьӧс. Кодлыкӧ коркӧ, гашкӧ, (надейтча тай-а) окота лоас унджык тӧдмавны ме йылысь да кутас корсьысьны, дерт, ӧтуввезйысь. А сэні ӧд вермасны и нинӧм абусӧ гижны…
Чужи ме Кӧрткерӧс районса Маджа сиктын. Сэки Коми АССР-ын на. Вои ме сэтчӧ мам кынӧмын нин. Мамӧй менам Куръядорысь (Маджасянь куим километр ылнаын ичӧтик грезд, кӧн ӧні унджыкыс дачник нин олӧ). Мамӧй казьтылӧ: декабр тӧлысь, веж мороз, ми батьыдкӧд шлапиктам подӧн, орччӧн гез йылын мӧс, вӧрасӧ гартлӧма, мед оз кынмы. Куръядорын пӧ садик тупкысис, школа тшӧтш, челядьлы некытчӧ ветлыны лоис, да быть пӧ ковмис вуджны Маджаӧ, кӧні олісны менам дед-баб. Ассьыныс дзик на неважӧн выльмӧдӧм керкасӧ донтӧм донысь вузалӧмаӧсь да ньӧбӧмаӧсь Маджаысь дед-бабкӧд орччӧн важиник грӧмадина-керка. Сэні ме и чужи-быдми.
Мамӧй кӧсйӧма менӧ гортын вайны, батьӧс вӧлӧм колхозсьыс оз лэдзны да, буретш пӧ гӧра-кӧдза кад, гортӧ волывлытӧг уджалӧ тракторнас муяс вылын. Ортсысяньыс пӧ кильчӧӧс тасалі, быттьӧ некод гортын абу, ачым гидӧд пыри. Бӧръя жыръяс лӧсьӧді рузум, тазйын шоныд ва, ножич, бабитчыны лӧсьӧдча. Но Анна нывъёртыс корсьӧма-аддзӧма мамӧс да котӧрӧн пыжӧн катӧдӧма Кӧрткерӧсӧ. Сыладор берегас пӧ «скорӧй» нин вӧлі виччысьӧ. Регыдӧн и вайӧма менӧ. Бӧрсӧ локтігас шлявгӧма-зэрӧма помся. Чайта, та понда ме и зэртӧ ёна куті радейтны.
Чужсьӧма менам пиняӧн. Врачьясыс пӧ чуймалӧны: медводдзаысь аддзам пиня кагаӧс…
Бать-мам менӧ нимтӧмаӧсь Анжелаӧн. И меным тайӧ нимыс бура дыр кажитчис. А сэсся мыйлакӧ другысь дугдіс, да куті висьтасьны Анжеликаӧн (и паспортын, вӧлӧм, тадз жӧ пасйӧма). Буретш сійӧ кадас телевизор пыр зэв ёна петкӧдлӧмаӧсь Америкаса негръяслысь право дорйысь Анжела Дэвисӧс. Сы серти и нимтӧмаӧсь. Искусство училищеын миян вӧлі куим Анжела, ме – Анжела-маленькая. А сиктын и ӧні ӧтнам татшӧм нимаыс. Татшӧм «коми» нимтӧ менсьым кыдзи сӧмын эз бергӧдлыны: и Анджела, и Аджика, и Ангелика… А ачым ичӧтдырйи вӧлӧм висьтася Алеляӧн.
Яслиӧ мамлы ковмӧма менӧ сетны куим тӧлысьӧн, сэки некутшӧм кага видзан отпуск абу сетлӧмаӧсь. Котӧрӧн петӧма кино петкӧдлыны. Куръядорын мамӧс тӧдӧмаӧсь Паладь Лидяӧн (ыджыд мамӧй Пелагея Степановна), а Маджаын – Кино Лидаӧн. Кымын киносеанс вылын ме медводдза радас узьлі! Мыйта билет вузавлі! Кымын афиша рисуйтлі! Мыйта лента «мотайтлі» да клеитлі! Кинотӧ петкӧдлыны велавлі и!
Яслиад менӧ пуктӧны вӧлӧм ыджыд манежӧ, да чӧв сэні куйла, ог нявӧстлы, кӧть рузум тыр ставсӧ лэдзӧма. Мамнас нянечкаӧс вӧлӧм шуа.
Садикын воспитательлӧн пиыскӧд пыр ёртаси да, ёна эз и чиршӧдлыны.
Велӧдчынытӧ радейті. Медводдза классын, помнита, скӧрала вӧлі, мый ставныс мыкталӧмӧн лыддьысьӧны. Ачым ӧд лыддьысьны водз (сэкъя кадӧ кӧ) велалі. 5 арӧсӧн вӧлі библиотекаӧ ветла. Коркӧ локтіс сиктӧ выль роч библиотекар и кор видзӧдліс, кутшӧм небӧгъяс ме бӧрйи, шуис, тайӧ пӧ тэныд, нывка, водз на, со пӧ серпасъяса книга босьт. Ме шуи, мый кужа нин лыддьысьны, но мортыд эз эскы да тшӧктіс гораа лыддьыны. Ёна и чуйяліс: сэтшӧм пӧ ичӧтик (тушаӧй зэв ичӧт вӧлі, и ӧні на кузясӧ эг быдмы), а лыддьысьӧ нин!
Дерт, кӧнкӧ, ыджыдджык воклысь велалі лыддьысьнытӧ, а, гашкӧ, и ёна водз. Ичӧт вок чужӧм бӧрын мамӧй менӧ сеткаа крӧватьын узьтӧдлӧма. Пукта пӧ вӧлі сэтчӧ тырыс «Работница», «Здоровье» да нӧшта кутшӧмкӧ журнал (сэки ми татшӧмтортӧ, ок, уна судзӧдлім), тэ кышӧдчан-кышӧдчан пӧ да и унмовсян.
Вит арӧсӧн жӧ кымын менӧ мамӧй пывсянын кольмӧдлӧма. Халат кежсьыс пывсянсьыд ковмӧма кайны, мед ловзьӧдны менӧ. Олӧмын нӧшта ӧтчыд кольмывлі верстьӧӧн нин. Садьми да, юрӧй потӧ-висьӧ, чеччи лекарствола, а палялі джоджын.
Пывсьынытӧ ичӧтсянь эг радейтлы. Сӧмын верстямми да окотапырысь куті корӧсясьны. Тайӧ меным мамсянь вуджӧма. Сійӧ мамсьыс пывсян гӧгӧрыс пыр пышъялӧма, кытчӧдз оз кут да шошаӧдыс пырт.
Коркӧ весиг мамӧй пывсьыны менӧ нуӧдӧма, а менам сылы шусьӧма (ар вита жӧ вӧвсьӧма): «Быдма да, юртӧ черӧн керала!». Мамӧй войбыд бӧрдӧма. Сы выйӧдз со пывсянтӧ мустӧмті…
Анжелика Елфимова