Челядя семьяяслы сетасны 10 сюрс шайтӧн, медым отсавны налы вуджны пандемияа сьӧкыд кадсӧ. Та йылысь висьталіс Россияса президент Владимир Путин.
Кодъяс да кыдзи вермасны босьтны сьӧма отсӧгсӧ, гӧгӧрвоӧдӧ Комиын Россияса Пенсия фондлӧн управлениеысь пресс-служба.
–Кодъяслы урчитӧма вичмӧдны ӧтчыдысь сетан сьӧма отсӧгсӧ?
–Дас сюрс шайта отсӧгсӧ урчитӧма сетны челядя семьяяслы быд кага вылӧ, кодъяс чужӧмаӧсь 2004 вося май 11 лунсянь 2017 вося июнь 30 лунӧдз. Та дырйи оз кутны видзӧдны, эм-ӧ семьяыслӧн мам капитал вылӧ правоыс.
–Кор позяс босьтны отсӧгсӧ?
–Куимсянь дас квайт арӧсӧдз быд кага вылӧ 10.000 шайтсӧ сетасны ӧтчыд 2020 вося июнь 1 лунсянь. Сійӧс босьтӧм могысь шыӧдчыны позьӧ 2020 вося октябрь 1 лунӧдз.
–Сетасны-ӧ сьӧма отсӧгсӧ кагалы, кодлы тырӧма нин 16 арӧсыс?
–Кагалы кӧ 16 арӧсыс тырис май 11 лунӧдз (тайӧ лунсяньыс шуӧма збыльмӧдны Россияса президентлысь 2020 вося май 11 лунся 317 номера индӧдсӧ), сьӧмсӧ оз сетны. Отсӧгсӧ урчитӧма сетны ныв-зонлы, кодъяслы абу на тырӧма 16 арӧсыс, а сідзжӧ кодъяслы 16 арӧсыс тырас 2020 вося май 11 лунсянь июнь 30 лунӧдз.
–10 сюрс шайтсӧ шуӧма сетны быд кага вылӧ?
–Да. Семьяын кӧ 16 арӧсысь ичӧтджык ӧти кага, сетасны 10 сюрс шайт, кык кӧ – 20 сюрс да тадз жӧ и водзӧ.
–Ми – Россияса граждана, но олам мӧд странаын. Вермам-ӧ шыӧдчыны 10.000 шайта отсӧгысла?
–Жаль, но он вермӧй. Тайӧ сьӧмсӧ урчитӧма сетны сӧмын Россияын олысь войтырлы.
Но ті кӧ олінныд мӧд странаын да бӧр бергӧдчинныд Россияӧ, отсӧгысла шыӧдчигӧн колӧ петкӧдлыны документъяс, кӧні пасйӧма ӧнія оланіннытӧ.
–Кагалы кӧ дас квайт арӧсыс тырас июнь помын, позяс-ӧ сы вылӧ босьтны отсӧгсӧ?
–Да, позяс. Оланпасын индӧма, мый 10 сюрс шайтсӧ сетасны кагалы, кодлы 16 арӧсыс тырас тавося июнь 30 лунӧдз.
–Кагалы кӧ куим арӧсыс тырас тавося апрельсянь июньӧдз, мынтасны-ӧ сылы и ӧтчыдысь сетан 10 сюрс шайтсӧ, и куим арӧсӧдз урчитӧм 5 сюрссӧ?
–Да, мынтасны. Кагалы кӧ куим арӧсыс тырис апрельын, семьяыслы сетасны апрельсьыс 5 сюрс шайт да июнь 1 лун бӧрын – 10 сюрс шайт.
Куим арӧсыс кӧ тырас майын, семьяыслы сетасны апрельысь да майысь 5 сюрс шайт (ставсӧ дас сюрс) да июнь 1 лун бӧрын – ӧтчыдысь вештан 10 сюрссӧ. А куим арӧсыс кӧ тырас июньын, апрельысь, майысь да июньысь вичмӧдасны 5 сюрс (ставсӧ дас вит сюрс шайт) да июнь 1 лун бӧрын – 10 сюрс шайта сьӧма отсӧг.
–Кутшӧм кудйысь урчитӧма сетны сьӧмсӧ?
–Федеральнӧй кудйысь.
–Видзӧдӧны-ӧ сьӧмсӧ сетігӧн, кыдзи олӧ семьяыс – судзсяна али судзсьытӧма?
–Оз видзӧдны. Отсӧгсӧ сетӧны быд семьялы, кӧні быдтӧны куимсянь дас квайт арӧсӧдз челядьӧс. Та дырйи тӧд вылӧ оз босьтны, уджалӧны-ӧ бать-мамыс, ыджыд-ӧ налӧн нажӧткаыс, воӧ-ӧ налы пенсия либӧ пособие.
–Кыдзи шыӧдчыны сьӧма отсӧгысла?
–Тавося октябрь 1 лунӧдз колӧ шыӧдчыны «Госуслуги» порталса «Личнӧй кабинетӧ» (https:ӦӦposobie16.gosuslugi.ruӦ). Некутшӧм содтӧд документ оз ков.
Шыӧдчыны позьӧ и Пенсия фондлӧн кар-районса юкӧнӧ. Но коронавируса вуджан висьӧм паськалӧм вӧсна ӧні сэтчӧ позьӧ веськавны сӧмын водзвыв гижӧдчӧмӧн.
–Вермас-ӧ шыӧдчыны ӧтчыдысь сетан сьӧма отсӧгысла кагалӧн батьыс?
–Да. Шыӧдчыны вермасны кагалӧн чужӧм йылысь свидетельствоын пасйӧм мамыс и батьыс. Шыӧдчасны кӧ кыкнанныс, сьӧмсӧ вуджӧдасны сылы, коді вӧчис тайӧс водзджык.
–Вермас-ӧ опекун шыӧдчыны ӧтчыдысь сетан сьӧма отсӧгысла?
–Да, вермас. Но та могысь сылы аслыс колӧ волыны Пенсия фондлӧн кар-районса юкӧнӧ.
–Позяс-ӧ шыӧдчыны пенсия фондӧ мортлы, коді оз ов аслас прописка серти?
–Да, позьӧ. Сьӧмсӧ сетӧны оланін вылӧ видзӧдтӧг. Тіянлы позьӧ шыӧдчыны Пенсия фондлӧн любӧй кар-районса юкӧнӧ. Шыӧдчыны вермас и бать-мамлӧн сідз шусяна представитель.
–Кытчӧдз урчитӧма дас сюрс шайта сьӧма отсӧгла шыӧдчан кадсӧ?
–Та могысь урчитӧма вит тӧлысь. Шыӧдчыны колӧ «Госуслуги» порталӧ либӧ Пенсия фондлӧн кар-районса юкӧнӧ 2020 вося октябрь 1 лунӧдз.
–Семьяын куимсянь дас квайт арӧсӧдз кык кага. Колӧ-ӧ гижны шыӧдчӧмсӧ быд кага вылӧ торйӧн?
–Оз. Гижны колӧ сӧмын ӧти шыӧдчӧм.
–Кыдзи позяс тӧдмавны, сетасны оз меным 10 сюрс шайта сьӧма отсӧгсӧ?
–Шыӧдчӧмсӧ кӧ вӧлі сетӧма «Госуслуги» порталса «Личнӧй кабинетӧ», вочакывсӧ йӧзӧдасны сэні жӧ, Пенсия фондлӧн кар-районса юкӧнӧ кӧ – оланпасын урчитӧм кадӧ сьӧмсӧ вуджӧдасны мортыслы юӧрттӧг. Сэк жӧ мед тӧдмавны тайӧс, мортыс ачыс вермас волыны Пенсия фондлӧн юкӧнӧ либӧ телефон пыр та йылысь юавны.
Шуӧмаӧсь кӧ, мый сьӧма отсӧгсӧ оз сетны, шыӧдчысьыслы юӧртасны та йылысь торъя письмӧын да гижасны, мыйла оз сетны.
–Мый колӧ кутны тӧд вылын шыӧдчӧмсӧ гижигӧн?
–Тӧд вылын колӧ кутны, мый отсӧгсӧ сетӧны Россияса гражданалы. Мукӧд странасалы сьӧмсӧ оз мынтыны. Оз вичмӧдны и Россияса гражданалы, кодъяс олӧны суйӧр сайын.
Опекунъяслы колӧ шыӧдчыны Пенсия фондлӧн юкӧнъясӧ.
Быть колӧ индыны банкын шыӧдчысьлысь тшӧтсӧ. Мукӧд мортлӧн тшӧт вылӧ сьӧмсӧ оз вуджӧдны. Пасйӧма кӧ мӧд мортлысь тшӧтсӧ, шыӧдчӧмсӧ колӧ гижны выльысь.
Содтӧд сьӧмсӧ оз мынтыны:
–бать-мамлысь право мырддьӧмаяслы;
–кагаыс кӧ, код вылӧ вӧлі урчитӧма сетны 10 сюрс шайтсӧ, кулас;
–шыӧдчӧмас кӧ индӧма ылӧдчана юӧр.
–Шыӧдчӧм серти кӧ меным шуӧмаӧсь мынтыны тайӧ сьӧмсӧ, кыдзи ме верма сійӧс босьтны?
–10 сюрс шайтсӧ вуджӧдӧны сӧмын шыӧдчӧмын индӧм банкса тшӧт вылӧ. Коронавируса вуджан висьӧм паськалӧмкӧд йитӧдын пошта пыр оз мӧдӧдны.